Sorkari Dimapur District nunga ILP benoktsü: Angh, Acharya

Kohima, Tsüklai/February 21 (TYO): Tribal tentettem aser kaketshir tentettemi rongshiba nung ajemdaker Nagaland sorkari state nung shishilembaba tiyongtsü- Dimapur District densema state tesem ajak nung Inner Line Permit (ILP) benoktsü lemtetogo.
Tanü State Assembly budget senden mezüngnü jembidang Nagaland Angh, P B Acharya-i, “Dimapur densema state tesem ajak nung ILP benoktsü,” ta metetdaktsü.
Bengal Eastern Frontier Regulation Act of 1853 kübok, Nagaland semdangtsü atema Naga nunger masüba nisungtem ket nung ILP alitsüla, ajisüaka iba ozüng kübok Dimapur district bo mezüngsemi liasü, ibayongji Nagaland Tribes Council, Naga Students’ Federation aser Naga Mothers Association densema state nung tribal tentet aikati sorkar dang ozüng alema Bangladesh nunger aruba nokdangtsü asoshi Dimapur nunga ILP benoktsü takhangba agüja liasü.
Acharya-i, “Ozüng alema bendangertem Nagaland-i marutsü atema onoki ILP agutsüba inyakyim junga yanglutsü. Sorkari iba atemaji legal aser administrative mera agia inyaktsü aser iba nükjidong ataloktsü atema onoki lokti tentet balala, Village Councils aser nüburtem teyari nüngdaktsü,” ta metetdaktsü.
Paisa, Citizenship Amendment Bill (CAB) 2016 ya ajak atema tebilemtsü onük ka lir, iba denji külemi state nung ozüng alema arurtem ajanga amokmerenji onoki meteta lir, ta ashi.
Pai ashiba agi, tang state nung ILP agutsüba inyakyim tashi itshitsü atema onüktem benoktsü aser ozüng alema arurtem mittsü asoshi asalentong benoktsü asoshi sorkari committee ka tentetogo, ta metetdaktsü.
Committee-i report agutsüogo aser sorkaria ibaji agizükogo; ibaji mapa küma benoktsü atema ozüng aser telatetbatem yanglutsü asoshi tetuyuba agutsüogo, ta Angh-isa metetdaktsü.
Acharya-i, CAB 2016 benokba tayongzükba ajanga Nagaland sorkari iba bill anema nokdak aser magizük, yamaji Jan. 31 nü Chumukedima nung lokti tentettem, tribal hohos, melungtet teloktem aser yimtenren party tem consultative senden ka amenba mapang nung CAB magizük, ta ashi.
Naga yimtenren ken o dak sendakba nung Angh-i, “Tribal Hohos aser lokti tentet balala, Arogo, melungtet teloktem aser Naga national political groups (NNPGs) ajaki meranga inyakba ajanga tangbo telok balala (Naga yimtenren telok balala) longjemogo, aser iba ya teti atema yimjung angutsüsa Naga yimtenren onük latettsü atema Naga yimtenren teloktem atema maongka tajungtiba asutsü,” ta ashi.
Ano külen yashi State Home Department-i, February 26 nü Kohima nung Naga tribal tentettem, lokti tentettem aser Arogotemi Naga yimjung ken o nung Centre nungi interlocutor, R N Ravi den senden ka amentsü metetdaktsüogo.
Sorkar inyakyim dak sendakba nung Acharya-i, “Ozü sorkari teladak süa junga yimsüsüba ajanga sorkari nübur tenzüktsü lemtetogo,” ta metetdaktsü.
Iba dak sendakba nung pai, sorkari state atema Lokayukta shimogo, aser ibaji ajanga ochimashi anema inyaktsü aser ochi obendang angutsü, ta ashi.
CM Dashboard ajanga department balala indang schemes osangtsüsang metetdaktsür, ta pai ashi.
Nüburtem anema-alibaren jenjang ajungkettsütsüji state sorkar atema kanga tongtibang, ta shia Angh, Acharya-i, Dimapur nung National Centre for Disease Control Branch ka amenoktsü atema state sorkari MoU ka sign süogo, ta metetdaktsü.
Yaküm November ita nung Kiphire nung upgrade asüba hospital tasen ka semzükogo, Noklak nung yipden 30 aliba integrated AYUSH Hospital ana semzükogo aser Dimapur nung yipden 10 aliba hospital semzükogo, ano iba dak alia Kohima district kübok Razha Chedema nung AYUSH Hospital ana aser Mokokchung district kübok Sabangya nunga AYUSH hospital ka tang teyangludak lir, ta paisa metetdaktsü.
Kohima nung Medical College ka amenoktsü atema tuyuogo aser ibaji ajanga nüburtem taginüba atangji nung ataloktsü, ta pai metetdaktsü.
“Asenok ya aluyimba lokti ka lir, anungji aluyimertem income anasü akumtsü atema onoki mozü mamshie aonsotsü tsünüba, süngjanglijang lu, shiruru metsühba, coffee lu ayimba aser sericulture nung rangloker inyaker,” ta pai ashi.
FOCUS-Fostering Climate Resilient Upland Agriculture System Project-i International Fund for Agriculture Development (IFAD) den yaritepa state nung aluyimba jenjang ajungkettsütsü atema inyaker, ta pai ashi.
State nung loktiliba aser rongsenkettsüng ajungkettsü atema gari lenmang ya kanga tongtibang, iba dak sendakba nung Special Road Programmes, NABARD-RIDF, PMGSY aser Ministry of Road Transport & Highways kübok GOI fund ajanga project agizüka inyaker, ta pai metetdaktsü.
Power Advisor, H Tovihoto Ayemi-i Angh-i jembiba onük pelaa agizük aser Advisor, N Bongkhao Konyak-i repsema agizük.
Deputy Speaker, Zhaleo Rio-i iba onük nung asüng o lemteptsü ta metetdaktsü. Paisa züngsem, asür Imtikumzuk aser taoba MLA, asür K Yamakam na bilemteta metetdaktsüba sülen züngsemtemi minute ana mokremer asürtem bilemteta liasü.