India-i Indus Treaty kübok ayongtem indang tzü nokdangtsü

New Delhi, Feb. 22 (Agencies): Indus Water Treaty kübok ayongtem nungi Pakistan dangi yokba tzü nokdangtsü atema India-i telemtetba agiogo, ta Union Minister, Nitin Gadkari-i metetdaktsü.
Taoba hopta Jammu & Kashmir kübok Pulwama nung JeM kiralongrartemi CRPF sepai amakdang sepai 40 tepsetba sülen tanü Minister-i iba osang ya metetdaktsür.
Tesülen ketdangser kati, iba ya telemtetba tasen ka masü, kechiyong Water Resources Minister-ibo ibaji teti jembia arur, ta metetdaktsü.
Gadkari-i twitter ajanga, “Ato kilonser @narendramodi lenisüba nung ozü sorkari Pakistan nung yimokba asen tzü nokdangtsü telemtetba agiogo. Onoki anüdoklen aliba ayongtem nung tzüji meyipshishia Jammu & Kashmir aser Punjab nung asen nüburtem nem agutsütsü,” ta metetdaktsü.
Taoba hopta kiralongrartemi CRPF sepaitem amakba sülen aikati kidanger linük (Pakistan) anema langkabosa inyaktsüla, ta akhangba mapang ka nung Pakistan-i yokba Indus tzü nokdangtsü atema telemtetba agir. Iba dak alia Pakistan nem ‘Most Favoured Nation’ jenjang aguja aliba agientsü atema India-i telemtetba agiba den külemi alima linüktemi Pakistan sendoktsü atema India-i asalentonga inyaktsü.
Pakistan nung amenoka aliba kiralongrar telok- Jaish-e-Mohammed (JeM)-i CRPF sepai 40 tepsetba sülen India-i Pakistan nungi mangaba osettsüset ajak nung saru shilem 200 agitsü lemtetogo.
India-i Pakistan dang February 14 nü tatalokba atema mang ayangtsü, ta metetdaktsüogo.
2016 küm kiralongrartemi Uri nung army camp amakba sülen-a aikati Pakistan nung yimokba Indus tzü nokdangtsü atema takhangba aguja liasü.
Ketdangsertemi ashiba agi, tzü nokdangtsü atema telemtetbaji mapa küma inyaktsü atema küm 6 shi agitsüa akok, kechiyong tzü nokdangtsü atema tzü-nokdang (dam) metong nung metre 100 tashi yanglutsüsa akumtsü.
1960 küm agiba tzüngzüktep- Indus Water Treaty kübok anüdoklen aliba ayongtem-Indus, Jhelum aser Chenab ayongtem Pakistan nem agutsü aser anüdoklen aliba ayongtem- Ravi, Beas aser Sutlej ayongtem India nem agutsü.