Assam nung yi nung mim jemsemer nisung 25 asü

Guwahati, February 22 (Agencies): Assam kübok Golaghat district nung yi nung mim jemsemer nisung 25 tashi asü.
Tasürtem rongnung tetsür 15 aser tebur 10 liasü, ta ketdangsertemi ashi.
Golaghat district nung tebur 12 aser tetsür 6 dena ajak agi 18 asü. Tanüngba nisung tenetji Jorhat Medical College and Hospital nung asü, ta Health department ketdangsertemi ashi.
Yasüng 7:30 ako meta süngolu nung mapa inyaker nisung pezü mozü kidangi anir ao dak parnok idakji asü, ta ketdangsertemisa shisem.
Nisung 8 tashi mozü kidang anepalua aru saka Hokolbarnep parnok asü.
Sanjay Oran ta ser süngolu nung mapa inyaker kati ‘sulai’ ta ajaba yi bener aru. Iba sülen Halmira Tea Estate nung mapa inyakertemi par kidang yiji alia ajem.
“Yi tendangtsü atema bener yokogo, ajisüaka yi bener aruba pongdang nung mim liasü südi,” ta Deputy superintendent of police Partha Protim Saikia-i ashi.
Yiji Halmira Tea Estate nung masü saka tangalen nungi yangluba bener aruba liasü, ta paisa ashi.
Golaghat nung yi nung mim jemsemer nisungtem asüba atema tebilemtsü bena Assam chief minister Sarbananda Sonowal-i bushisüngdang ka asütsü tetuyuba agütsüogo.
Iba tatalokba atema Chief minister Sonowal-i one man inquiry ka shim aser Upper Assam Division commissioner Julie Sonowal dang iba osang bushiteptsü atema mapa lemzüktsü.
Sonowal-isa minister Topon Kumar Gogoi, MP Kamakhya Prasad Tasa aser MLA Mrinal Saikia nunger dang tesem tonga oa osang agiteptsü atema tetuyuba agütsü.
Külen, Assam State excise minister Parimal Shuklabaidya-ia department inquiry ka inyaktsü nungloktsüogo.
District nung yi tamajung amshiba menokdangba atema ketdangser ka mapa nungi anentsüogo, ta Shuklabaidya-i ashi.