Ato kilonser Modi nem Seoul Peace Prize agutsü

Seoul, February 22 (Agencies): Ato kilonser, Narendra Modi-i alima sabang nung amalitepa inyakba aser alima rongsenkettsüng ainba nung shilem tajung agiba atema tanü pa nem Seoul Peace Prize agutsüogo.
Tanü South Korea yimtiba, Seoul nung sentong ka ayongzüka Seoul Peace Prize-i Modi nem iba sempet agutsü. Kasa sentong nung Ato kilonser indang taküm otsü aser pai inyaktetba mapatem indang film tatsüka sayua liasü.
Modi nem iba award agutsüdang award committee-i, India aser alima rongsenkettsüng ainba nung pai shilem agiba, aser takar o sensakertem na tsüngda ongdang ajemdaktsüba atema iba sempet agutsür, ta metetdaktsü.
Committee-isa regional aser alima nung yimjung atema linük balala den mapatong benoka inyakba atema pa nem tenüngsang agutsü.
Iba award agizüker nisung 14bubaji Modi asutsü. Taoba mapangtem nung taoba UN Secretary General Kofi Annan, German Chancellor Angela Merkel aser nüngtugu international relief organizations- Doctors Without Borders aser Oxfam nungeria iba award nguogo.
Seoul nung 24buba Olympic Games takok ngua agitetba nüngtem nung 1990 küm Seoul Peace Prize ya tenzüka liasü.