Meriema nung Sub Centre-Health & Wellness Centre ka semzükogo

Kohima, February 22 (TYO): Tanü Meriema Sub Centre, Kohima nung Ayushman Bharat kübok Sub Centre-Health & Wellness Centre semzükba sentong agiogo; iba Centre ya Principal Secretary Health & Family Welfare, I. Himato Zhimomi-i semzükja liasü, ta ketdangsertem osang ka ajanga metetdaktsü.
Iba sentong nung jembidang Himato-i, Ayushman Bharat kübok tongshi ana lir: National Health Protection Scheme (NHPS) aser Health & Wellness Centre (HWC) lir, kong Nagaland sorkari state ajaklen Centre 56 amenoktsü atema tanü Health & Wellness Centre semzüker, ta metetdaktsü.
Pai ashiba agi, Ayushman Bharat indang tongti nükjidongji taküm anema alitsü atema dang masü saka asen melungsentsü aser tanela ajak anema alitsü atema lir.
NHPS kübok schemes atema register süa alir kati shirangba mapang nung sen lakh 5 tashi angutsü, ta pai ashi.
Paisa, HWC centre lapokba ajanga asenok taküm anema aliba dang masü saka centre nung service balala ajanga lenla aika nung ajangzüktsü, ta ashi.
Paisa Arogotem dang nüburtem anema alitsü aser sensotem tsüngda pelaa alitsü atema awareness agutsütsü ayongzük.
Mission Director National Health Mission, Nagaland, Dr. Kevichusa Medikhru leniba nung iba sentong agia liasü. Pai ashiba agi, MoHFW-i linük nung SCs lakh 1.5, Health & Wellness Centres (HWCs)-i upgrade sütsütsü.
Iba dak sendakba nung Dr. Medikhru-i Department of Health & Family Welfare Nagaland (NHM)-i UPHCs asem aser PHCs ana upgrade sütsüogo aser Nagaland nung SCs 56 ji shilem lemsar upgrade asutsü, ta metetdaktsü.
Paisa, iba Centre nung comprehensive laboratory, (19 test HWC-PHC aser HWC-SC nung test 7) Pharmacy, robust IT system, nüngdakba mozütem aser supplies den infrastructure tajung alitsü.
HWC nung service package 12 alitsü, aser item rongnung mashisa aser tanur asoba dak sendakba service, tanur bena alidang anepaluba den kinü tanur health care service, tanur ka aser tainlonglong health care services, family planning, contraceptive services aser reproductive health care services, menatepba tashidak anepaluba: national health programmes, tilateri shirangba atema general out-patient care, screening, memenatepba tashidak balala nokdangba, azüokba aser anepaluba, ophthalmic aser ENT timtem, basic oral health care services, teintet sensotem health care services, emergency medical services, screening aser mental health services densema lir.
Mission Director-isa ashiba agi, Community Health Officer (BSc. Nursing/GNM den field experiences) shirnok ita trok intensive training agia lir, parnoki Centre nung posting agutsütsü.
Paisa yangji aliba nüburtem dang, Health & Wellness Centre takok angutsü atema comprehensive Primary Health Care maparen nung department aser yimdak aliba staff tem den amalitepa inyaktsü ayongzük.
Kasa sentong nung Meriema Village Council Chairman, Kelhoupralie Whuorie-i sorkar ketdangsertemi yimdak iba Centre lapoktsüba atema pelaba lemsatepa liasü.
State Program Officer NHM, Nagaland, Dr. Thanghoi Lam-i tepela anküp o jembi; iba sülen anema alibaren ajungkettsütsü atema Medical Staff aser Meriema youth na tsüngda volleyball asaya.