G.H.S, Longchem kaketshirtemi ola madoki yimdong süa senzü

Dimapur, TYsüklai/February 22 (TYO): Longchem Town nung February 22, 2019 Hokolbarnü Govt High School, Longchem kaketshirtemi ola madoki yimdong süa senzü aser iba mapang parnoki EAC Longchem ajanga Deputy Commissioner, Mokokchung dangi tezüluba (representation) ka agüja liasü, ta osang ajanga metetdaktsü.
Longchem Town nung temaba kakestshir tentet, Longchem Kaketshir Telongjem (LKT)-i GHS Longchem nung Mathematics tesayur post atema DC Mokokchung dangi mepishia zülua liasü koba 2017 December ita nungi iba school nung Mathematics tesayur post tzüngla süa arudar.
G.H.S Longchem school nung tenzüka aliba maths tesayurji 2017 küm transfer yoka liasü aser tanü tashi iba tesayur melena tesayur tanga appoint süa mali. Taoba mapang nunga Longchem Kaketshir Telongjem aser tsüraburtem longjema maths tesayur ka yoktsü atema department dangi tezüluba agüja liasü saka tang tashi nung kecha mapa mekümtetti lir.
Iba dak sendakba nung LKT-i ashiba agi, school atema maths tesayur ka nüngdaka tezüluba nung agütsüba ama takaratiba nung mapa küma meinyaktsüra onoki iba anema ano maneni tapet mera agia noksaktsü.