AR nem ‘warrant’ agütsüba magizüker

Guwahati February 22 (Agencies): Ministry of Home Affairs (MHA)-i Assam, Nagaland, Mizoram, Arunachal Pradesh aser Manipur state tem nung Assam Rifles-i warrant kecha melii nisung aputsü, mita aotsü tashi agütsüba ashishir aser magizüker, ta North East Students’ Organisation (NESO)-i metetdaktsü.
Iba ya India sorkari tashiyim agi nübortem azüoka ayutsü merangba ka aitsür. Talisa iba tetuyuba ajanga BJP-i aniba Centre sorkari North East nung lisopurtem hao ta maliba kuli sayur, ta NESO-i ashi.
“Nübortemi anema noktakba ajanga tawa Rajya Sabha nung Centre sorkari CAB 2016 benoka magizüktetba den iba tetuyuba sendaktepa lir asü mesüra Lok Sabha Election sülen BJP-i CAB benokdang nübortem azüoktsü atema Assam Rifles nem tashi agütsür?” ta NESO-isa asüngdang.
North East nung lisopurtem küm aika AFSPA ajanga kangshia aser timtema arur saka iba nung India sorkari temulung masür ama lir, aser tang Ministry of Home Affairs (MHA)-i tetuyuba agütsüba ama tashi alia amshiba mapatem inyaker, ta parnokisa metetdaktsü.
India sorkari iba tetuyuba agütsüba ya North East nung lisopurtem tali reshikangshitsü atema lir, anungji lisopur jak longjemtsü aser kechi atalokdir atalaoka posema yariteptsü atema mepishir ta NESO-i ashi.
Hokolbarnü People’s Representation for Identity and Status of Mizoram (PRISM) party-ia Centre-i Assam Rifles nem warrant agütsüba meyipa agiang ta takhangba agütsü.
“Centre-i iba warrant meyipa magira, onoki mapa inyaktsü” ta PRISM-i ashi.
Centre sorkari mapang shitak nung mapa meinyakra PRISM-i iba onük National Human Rights Commission aser Human Rights Forum dangi abentsü sentong lir.
“Iba warrant ya lisopurtem reshikangshitsü atema lir aser Indian Constitution o Human Rights Law alema lir. Iba warrant ya linük ajunga nung amshitsü meyanglushira Centre sorkari iba telemtetba meyipa agitsü imlar” ta PRISM president Vanlalruata-i ashi.
Külen, Assam Legislative Assembly nung Opposition lennir Debabrata Saikia-ia Hokolbarnü Centre-i Assam Rifles nem tashi balaka agütsüba aitsü.
Iba ya northeast nung emergency sangdongba ama lir aser India Linük Temzüng ajanga senso nem ‘freedom of movement’ melaba agiener. Anungji iba ya democracy atema lendong lir, ya Saikia-i ashi.
2018 küm Prime Minister Narendra Modi-i Independence Day onük jembidang North-east kübok state tem nungi Armed Forces Special Powers Act (AFSPA) agientsü ta nangzük. Taoba mapang Imphal nung pre-election rally ka nung Modi-isa Centre nung BJP sorkar kümra AFSPA agientsü ta nangzük, ta Saikia-isa shisem.
Ajisüaka, tang North-east nung Assam Rifles nem tashi balaka agütsüba ajanga Prime Minister-i temela ana dener o jembiba jungkai adoka sayur, ta paisa metetdaktsü.