Deputy CM Patton-i ILP osang metetdaktsü

Kohima, February 22 (TYO): Inner Line Permit (ILP) atema sorkari shimba ludeni bushitetba osang Assembly nung benokang ta civil society temi takhangba agütsüba atema tanü assembly nung Deputy Chief Minister Y Patton-i iba osang lemsatep.
August 21, 2018 nü Nagaland nung ILP maparen akangshitsü aser ozüng alema arurtem noktangtsü lenmangtem bushitsü atema sorkari luden ka tentet, ta Patton-i ashi.
Ludenji Principal Secretary of Personnel and Administrative Reforms Department, Abhishek Singh menden ser tentet aser parnoki bushitetba osang sorkar ket nung agütsüogo. Parnoki tebilembatem ashiba nung Nagaland-i aruba ILP amertem entry & exit mapa inyaktsü dena lir, ta paisa ashi.
ILP indang ludenisa Indigenous inhabitant certificates mashi agütsüba inyakyim noktangtsü atema Register of Indigenous Inhabitants of Nagaland (RIIN) ka renemtsü atema tebilemba shia lir, ta Deputy Chief Minister-isa metetdaktsü.
February 15, 2019 nü State Cabinet senden amendang ILP ludeni agütsüba osang benoka olemteper agizük aser iba atema tetuyuba kar agütsü. Itemji i) Dimapur District dena Nagaland state ajungalen ILP mapa inyaktsü, ii) ILP indang Committee nem ita ka tsüngda ILP atema Rules & Regulations yanglutsü, aser iii) Home Department-i ILP maparen online system nung renemtsü, ta Y Patton-isa ashi.