BCCI-i kechi lemtetdir iba sülen onok anidaktsü: Virat Kohli

Tsüklai/February 23, 2019 (Agencies): 2019 World Cup nung BCCI-i Pakistan den masayanüi aliba mapang ka nung India captain Virat Kohli-i Honibarnü ashiba agi, cricket body-i kechi telemtetba agidir iba sülen parnok anidaktsü.
Australia den Visakhapatnam nung mezüngbuba T20I masaya tsüngda jembidang Virat Kohli-i Pulwama nung CRPF sepai asür kibongtem den asükhu lemsatepa liasü.
Kohli-i ashiba agi, “Pulwama lendong nung asür CRPF sepai kibongtem den onoki asükhu lemsateper. India team iba tatalokba ajanga aoksadaktsüogo aser kanga jashia bilemer.’
Pakistan den World Cup nung asayatsü indang jembidang Kohli-i ashiba agi, “onok tenokdakdak kanga tongmelang lir. Linüki kechi aginer aser BCCI-i kechi telemtetba agidir iba sülen onok anidaktsü. Sorkar aser board-i kechi telemtetba agidir ibaji onoki akhümtsübua agizüktsü.”
Hokolbarnü India coach Ravi Shastri-ia Mirror den sensaksemba mapang kasaji shia liasü. “Telemtetba ajak sorkar aser BCCI dak keta lir. parnoki kechi atalokdar aji jangjaa meteta lir aser iba dak ajemdaker parnoki telemtetba agitsü. Parnoki kechi telemtetba agidir iba sülen onok anidaktsü. Sorkari nenok WC asayatsü nüngdak mali ta shira ni iba sülen anidaktsü,” ta Shastri-i ashi.
“Asayamung June 16 nungang tenzüktsü. Onoki sorkar den ken o ashishiteper telemtetba agitsü,” ta CoA chief Vinod Rai-i ashi.