Chandela-i Women’s 10m Rifle gold medal kokogo

Tsüklai/February 23, 2019 (Agencies): Tang tasayadak ISSF World Cup 2019 nung Honibarnü Apurvi Chandela-i World Record tasen ka yanglua India asoshi mezüngbuba gold medal koktetogo. Dr. Karni Singh Shooting Range, New Delhi nung Arishi küm 26 tain shooter yagi 10m Women Air Rifle final nung point 252.9 nguteta gold medal koktetogo.
Final nung Chandela-i meyilongi tenzük. Lai mezüngbuba shot nung point 10.1 akha. Mezüngbuba series ana tembangba sülen la jenjang 7buba nung liasü. Ajisüaka asayayonga aoba mapang lai tajungba asayateta temaba jenjang atong. “Ni score asütsü sentong yanglur masayar. Tetenzük nungbo kü jenjang jungrara masü asü, anungji ni kü indang setting tera melenshi aser iba ajanga temelenshi bener aru,” ta lai ashi.
Final round nung Chandela aser China tsür Zhao Ruozhu na kanga toktepa asaya, shibai Qualification stage nung point 634 nguteta World Record yanglua liasü. Ajisüaka final two-shot series nung, Chandela-i 10.6 aser 10.8 khateta gold medal angu aser Ruozhu-i silver medal angu.
China tsürsa Xu Hong-i final nung point 230.4 khateta bronze medal angu.
Kanga dang toktepa asayaba indang jembidang Chandela-i taoba küm Munich World Cup bilemtetshia ashiba agi, “Munich World Cup nung ni tejakdang sür asayaa liasü saka ni atsüngzüka ao aser iba ya ni aibelenba ajanga liasü. Ajisüaka item ajak toktsür ni tejakleni otetba atema pelar kechiyong iba amala tatalokba yagi tekolok minpronger.”