Bengaluru nung Aero India tesem anasa gari 300 rongdok

Bengaluru (Karnataka), February 23, 2019 (Agencies): Tanü Bengaluru yimti anasa 2019 Aero India show agiba tesem anasa gari anendena ayuba tesem nung mi adok, aser iba lendong nung gari 300 dak tema rongdokogo.
Osangbener den jembidang Fire & Emergency Services Director General of Police, M.N. Reddi-i, “Mopung tashie aonba den külemi ai takong nung mi adok südi, ta bilemer,” ta metetdaktsü.
Iba tatalokba nung gari 300 shi rongdok saka tangbo miji ensepogo, ta paisa metetdaktsü.
Tanü 12:00 ako meta mi adok aser mapang tatsüka tsüngda gari anendena ayuba tesem nung gari aika arong. Bengaluru yimti tezülen Yelahanka nung aliba Indian Air Force base nung Air show reprangi arurtem meyong gari rongdok.
Tanep 10:00 ako nungi tayimtsü sayaba tenzüka liasü, ajisüaka 12:00 ako nung mi lendong atalokba ajanga iba sentong thinen, saka 2:00 ako nungi sentong tanaben tenzüka 5:00 ako nung tembang.
Aero India atema renemshiba mapang nung Indian Air Force indang Suryakiran Aerobatic Team tayimtsü ana anüng nung tsüktepa lendong atalokba sülen anogo ishika tsüngda tanü iba lendong ya ataloker.
Iba lendong nung pilot asem nungi ka asü.
Anogo pongunü air show ya Bodhbarnü tenzük aser asüng (Amongnü) tembangtsü.