Kohima nung traffic ozüng melenshir

Kohima, February 23 (TYO): 13buba Nagaland Legislative Assembly tasembuba session aser Sekrenyi Mini Hornbill festival dak sendakba nung security atema Kohima nung February 25-26, 2019 anogotem nung traffic ozüng melenshsir, ta PRO DEF Kohima sangdong ka ajanga metetdaktsü.
Anepdang 8:00 ako nungi 10:00 ako tashi Naga Hospital nungi Naga Bazaar ajangdanga Census Office Junction tashi gari lenmang nung tsünglangleni aluba garitem dang senzütsü aser iba lenmang tiplen garitem anena ayutsü memelatsü, ta sangdong nung shia lir.
Assembly senden aliba mapang nung anepdang 6:00 ako nungi assembly senden metembang tashi Kohima jila nung gari tulutem senzütsü memelar; assembly senden agiba mapang Kohima jila nung gari nung khu oshiketba aser oshizükba (loading & unloading) mapa ajakji anepdang 6:00 ako tashi nungbosa tembanga inyaktsüla, ta kasa sangdong nung shia lir.
Nüburtemi amalitepa inyaktsü imlar, ajisüaka ozüng alema inyakba garitembo atsüer aotsü aser iba atema senji gari kiburtemi agutsütsü, ta parnokisa metetdaktsü.