Kohima nung Mega Legal Services Camp ayonga agi

Kohima, Tsüklai/February 23 (TYO): February 23, 2019 nü Kohima Local Ground nung Nagaland State Legal Services Authority (NSLSA) aser Kohima District Legal Services Authority nati District Administration, sorkar department balala, stakeholders aser melungtet teloktem den senteper Mega Legal Services Camp ka ayongzüka agiogo, ta ketdangsertem osang ka ajanga metetdaktsü.
NSLSA-i state tesem ajaklen districts nung ketdangsertem den senteper legal camps agia arur aser tang tesüsa Kohima nung iba camp agia state nung districts 11 prongla nung iba camp agiogo.
1999 küm NSLSA tenzükba mapang nungi tenüka parnoki legal awareness ajungkettsütsü aser state nung maongka junga manguba sensotem nem legal teyari agutsütsü atema kanga meranga inyaka arudar.
Mega Legal Services Camp ajanga loktiliba nung nisung aikati sorkar indang welfare schemes balala metetba dang masü saka banking sector densema nija enterprise indang rajemogo, koba ajanga nüburtemi sorkar departments- Labour Department, Social welfare Department, NRHM, Land Resource Department, Horticulture Department densema department balala indang schemes aser sentongtem nungi tajangzük angur.
Anogo ka mega legal services camp ya Kohima local ground nung agi aser iba sentong nung tetushi tejaokerji Gauhati High Court nung Judge aser Executive Chairman NSLSA, Justice N. Kotiswar Singh liasü.
Pai Legal Services Awareness Camp indang nükjidongtem metetdaktsüba den külemi Legal awareness campaign ya kobi melii Sub- Divisions aser yimtsüngtem nunga ayonga agitsü, ta metetdaktsü.
Sensotem ajangzükdaktsütsü atema iba camp ayongzükba atema pai NSLSA aser District Administration nem tenüngsang agutsü.
Iba tetenzük sentong ya Mezivolu T. Therieh, NJS Member Secretary NSLSA leniba nung agi aser Rtd. Director Land Resource, Hoto Yeptho o DC Kohima, Gregory Thejawelie natia o tatsütsü jembia liasü.
Cultural Vibrant, Kohima Village-i ken ka aten aser Project Coordinator NSLSA, Limasenla Longkumer-i tepela anküp o jembia liasü. Iba sentong tembangba sülen Justice, N. Kotiswar-i stalls semzüktsü.