Ango nung formalin aliba putet; Seret 1700 endok

Dimapur, February 23 (TYO): Commissioner Food Safety cum Principal Secretary, Health & Family Welfare Department-i December 2018 nungi küm ka atema formalin mesüra preservative enokba ango nokdangtsü tetuyuba agüja liaka ketdangsertemi formalin enokba ango apu.
February 23, 2019 nü Kohima Municipal Council (KMC) ketdangsertemi Bye Pass Check Gate nung Dimapur nungi Kohima tashi ango belenba Tata mobile gari ka sota reprang.
Iba gari nung bena aliba Rohu, Katla, Pankaj aser Prawn agiteter State Public Health Laboratory-i tendangtsü atema bener yok aser idakji Food Analyst-i ango nung formalin enoka aliba putet.
Tang ketdangsertemi apuba angoji seret 1700 shi liasü aser District Administration, Police, KMC ketdangsertem aser Food Safety ketdangsertem lia Ziiriizou (KMC dumping site) nung raksa endok, ta Food Safety Cell Kohima, Nagaland-i metetdaktsü.