Arunachal nung PRC anema lungkak aitdang nisung ka khaset

Itanagar, February 23 (Agencies): Arunachal Pradesh sorkari shimtetba telok kati non Arunachalees nem permanent residence certificate (PRC) agütsütsü shidangba onük anema lungkak aitdang police-i Hokolbar aonung nisung ka khaset.
Lungkak aitertemi Civil Secretariat telungi aitsü merangdang iba lendong atalok.
Itanagar nung internet service shibangogo aser Army-i Naharlagun aser Itanagar tsüngda tensa süngjemdaktsütsü atema flag march agir, ta ketdangsertemi ashi.
Hokolbar nikongtsütsü lungkak aitertemi Itanagar nung gari 50 shi rongdoktsüba den gari 100 tema raksatsü. Parnokisa lung agi ona raradang police 24 dena nisung 35 yiru.
Hokolbar aonung IG park nung amungba International Film Festival nung timtem ajuru.
Nagaland nung kentener telok Alobo Naga and the Band-i iba benjung nung shilem agitsüba liasü saka nisung telok kati IG park telung nung garitem rongdoktsüdang parnok indang gari (Innova) dena rongdoktsü.
Nisung telok jagi IG park nung stage, sound system, portable movie theatre, truck gari, generator set ajak mitsü küma rongdoktsü.
“Onok PYBSS hotel nung jenoka lir, iba ya secretariat anasa lir. Onok jenoka aliba hotel kima injang khatar. Onok atema sarasademjang” ta Alobo Naga-i pa indang Facebook Page nung metetdaktsü.
Lungkak aitertemisa All Arunachal Pradesh Students Union (AAPSU) aser All Nyishi Students Union (ANSU) indang office tem rongdoktsü.
May 1, 2018 nü state sorkari tentetba Joint High Power Committee (JHPC)-i ashiba onük AAPSU aser ANSU-i posema nungiter.
JHPC-i sendaktepa alir ajak den asüngdangtepba sülen kin trok nem PRC agütsütsü junger ta shidang. Parnok ya Arunachal Pradesh lisopurtem masü saka küm aika Namsai aser Changlang district tem nung liyonga arur.
JHPC-i agütsüba osang ya Honibarnü Assembly nung benoktsüba sentong liasü saka Speaker-i tanü senden magitsü lemtet.
Honibarnü Union Home Minister Rajnath Singh-i Arunachal Pradesh nung alirtem dang süngjemtsü aser tensa meraksatsü atema mepishia metetdaktsü.
Rajnath Singh-i Arunachal Pradesh Chief Minister Pema Khandu den tensa indang osang metetpela.
Arunachal nung non-Arunachalee temji Deori, Sonowal Kachari, Moran, Adivasi, Mishing aser Gorkha nungertem lir. Assam nungbo parnok teimbaka Scheduled Tribes ta ajiteta lir.