Opposition NPF-i senden nung medeni lungkak ait

Advocate General-i Chief Minister metentsü

Kohima, February 23 (TYO): PDA sorkari inyakyim lateta aliba ama meinyaker ta tai tonglokja Honibarnü Nagaland Assembly nung question hour mapang opposition Naga Peoples’ Front (NPF) MLA temi senden nung medeni kimai alu.
Urban Development Minister Metsubo Jamir-i Rural Development Department indang tasüngdangba ka langzüba nung temulung masür ta Opposition lennir T R Zeliang-i ashi.
Ajisüaka, idangji Chief Minister Neiphiu Rio-i tasüngdangba kar langzütsü atema pai cabinet Minister kar nem tashi agüja lir ta ashi. Rio-i RD portfolio bena lir.
“Minister mashii kati tasüngdangba langzütsü akok” ta Rio-i ashi aser taoba mapang Assembly nung iba amaji inyaka aruogo ta paisa shisem.
Idangji TR Zeliang-i iba ama inyakyim ya tim masü anungji Chief Minister-i iba mapa inyaktsü atema telatetbatem kodang latet’ar shiang ta asüngdang. Ajisüaka, Chief minister-i telangzüba magütsütetba agi Opposition pur question hour mapang medeni kimai alu.
Assembly Secretariat nung pa indang office nung TR Zeliang-i osangbener den jembidang “Sorkari Department atema Advisor inyaktsü shimba MLA nem temelaba agütsütsü akok, saka minister kati tanga department ka indang telangzüba agütsütsü inyakyim mali aser inyaktsü ozüngtema lateta mali” ta ashi.
“Iba sorkar yagi ozüng alema inyak aser iba jagi onoki assembly session nung medeni kimai alu” ta paisa shisem.
Sorkari iba ama mapa inyakra, Opposition bench-i senden magitsü atema benoktsü aser tanüngba session nung shilem magitsü, ta TR Zeliang-isa metetdaktsü.
Iba onük nung sorkari Advocate General of Nagaland, K N Balagopal dendaktsü. “Chief Minister-i minister mashi ka nem temelaba agütsütsü atema tashi lir. Speaker medeni minister mashii kati tasüngdangbatem langzütsü akok” ta K N Balagopal-i ashi.
Opposition MLA temi public dak sendakba tasüngdangbatem asüngdangba Deputy Speaker-i magizüker ta tanü Opposition MLA Imkong L Imchen aser Kuzholuzo Neinu nati ashi.
Sorkari ozüng lateta aliba alema inyaker, ta Neinu-i tai tongloktsü.
“Sorkarji Treasury bench atema lir saka Assembly session ya Opposition atema lir. Sorkari mapa shitak inyaktsü atema onok nem shilem agidaktsütsüla” ta paisa shisem.