Nagaland yangluba mapang

Tensa majungba agi, election junga magitetba agi aser pei agitsü dang bilemba agi teimla tulu nung Nagaland mesemtetaka mapang talangka Nagaland junga meyangluteti pei lima agi pei nümamedangtet lia arudagi. Ajaki government mapa bushir saka government meyongbo kecha apayua mali repranga raksadaktsüba aser samadaktsüba nisungtemji asenok lir. Lia lia government mapa inyakertemi anir government school nung mezüngnütsüsa asenoki inyaktet aser government mozü kidangbo taneptsüa junga mengutettsüsa asenoki litetogo. Jogo, government indanga ta süra kibur maliba oset asütsü aser government nem agütsütsü ta süra tamajungba agütsütsü aser government mapa ta süra mashimashi inyaktsü ta asüba mahshi angatetba shisatsü tamajung agi Nagaland raksadaktsüogo. Koba government südir süaka aji asenok giovernment, anungji goverment akümtsübua aser meima government mapa ajunga shitak inyaktsüba ser nung kodang-kodaser goverment nung alirtemiang anir government tenüng aser mapa menendaktsütsüsa inyakar memetetiaka Nagaland kanga shirangdaktsüdagi. Itemji tanü lanurtemi angur, ajangshir aser jembir. Iba ama lanurtem rongnung jembiba kisüng jagi Nagaland yanglutsü mapang tajung ka arur asü ta bilemer. Mapang kabo Nagaland nung gari lenmang onsara majungba agi yimti tiyong nung motzü atsünga alidak lanurtemi tejashi marem mou atem aser ango pua sayu. Iba amaji nübortemi jembiba aser sayuba agi tanübo tesem aika nung lenmang junga yanglua aoba angur. Iba kasaji tesem kar nungbo government mozü kitema tajungba küma aotsü merangba angur aser ano taoba kümtem dang nungibo light-a terabo tajungba aruba metetter. Ajisüaka, ano kaketreju aika nung tesayurtem agi meperiba agi kaketshirtem tejashi marem longkak aitba asenoki angur aser angashir. Item olaji angashia government-i yakta school shia nung tesayur tajung peria yoktsü imlar. Koba lima südir süaka junga yanglutsü tenzüktsübaji government nung alirtemi masü saka nübortemi tenzüktsü. Nübortemi ola madok nungbo government nung alirtemi nübortem jenjang memetettsü aser government tenzükertemia temulung agüja metenzüktsü. Ibayongji, tanga state nungbo totzü nung naiya paisa ishika talila atununga nübortemi ola adoktsü aser government-i teinyaktsü tim meinyakra nübortem longkak aittsü. Ibaji tsübua government-i akok tashi nübortem shitak ochishia anepalutsü meranger. Item tongtibang teinyaktsütemji angateta tanübo Nagaland nung nübortemi peisasa telok tenteta külemi longjemer government inyakyim shitak kümdakja inyakdaktsütsü merangba angur. Itemji Nagaland tajungba küma yanglushitsü tenzükba mapang asütsü. Nagaland yanglushitsü asoshi nübortemi pei temeten, pei khuret aser government teinyaktsütem metettsüla. Idangji dang asenok kati ka aitsüteptsü melen kati ka ajungshitepa Nagaland tajungba küma yanglushi tenzüktsü.