Article 371A nung Medokmeperi aser Ashishitep adoktsübatem: Obangtsüka Ratetba aser Tajitetba Kar

– L. Moayanger Imchen, Advocate.

Tanü asüng asenok rongnung India temzüng arla ( Article) 371 A mapa küma inyaktetba aser meinyaktetbatem indang rajemtsü meranga bushidangba mapatem kanga shisangshisanga metetdagi. Nisung aikati kaketriju nung angazükbatem den parnok tebilemba balala osangkakettem nung aser ano osang prokba yimya balala ajanga lemsatepogo.
Ni shisaliokren len nungi aser ku tejangraba agi onük nung kü angatetba ka lemsatepner.
Ajaki hau ta asütsüba ken o kaji, linük temzüng ozüngtem rateta amshiba nung temaba obendangdak nungi obendang ka magütsü tashibo pei pei tangatetba balala asütsü Yangi ni züluba ocet yaa iba ama tebilemba aser teratetba den kecha balaka masü. Ajiodasüaka, India ama democratic lima ka, kong ochiobendang agütsütsü tangatetba nung temzüng ozüngtem akangakanga tera yanga lir, idakji lateta akaba temzüng ozüng anema mesüra senso ka atema pei bilemba aser angatetba jembitsü asoshi lenmang sademsadema lapokja lir. Iba tangatetba nung ni iba ocet zülutsü merangdangogo. Ni bushitsü aser sayutsü merangdangba dang nungibo ano tazünger aser medemertemiang tali tajungba teratet ngutettsü teimla nung ni iba ocet ya zülur.
Naga National Council(NNC) lenir A.Z.Phizo leniba kübok May 16, 1951 anogo nung Naga nungertem India kübok alitsü asü malitsü ta lemtetba tongtibang sentong ka (Plebiscite) agiba sülen Nagaland nung Naga Underground aser Indian Military Force tsüngda rara kanga sashia aküm. Idang nung jagi tang tashi kanga taochi maka amokmerenteper, aser iba ambangyim aser tashiyim maparen ajanga Nagaland tang tashi azüdokshi aser nüktzü tanen makai yimdagi. Iba ama tensa kanga mejungi aliba mapang nung ya Naga nunger mazüng memetet aser tongmelang National Council (NNC) volunteertem arok tangatetbaji, “Naga nungerji India nunger masü aser Nagaland ji India nunger Lushi masü. Naga nungeri India nungi independence akanger masü aser Naga nungerji India nungi atsüngina aotsü meranger masü. Nagaland nung tatalokbaji ambangyimi agitsü merangba tatalokba ka lir. Ya rara lir,” ta asüba yimten tangatetba liasü. “Ajangla martial law inyakyim den kasa 1956 nungi Nagaland nung emergency tia nung liasü aser Naga linük ajak tongpang raraba tesemtem aküm. Tuokrong aser tetsübutsü tatalokba aika atalok saka itemji aika alimaibo memetet süidaktsü.” (Ref:Nagas in the Crossroad. Tajen Ao).”Item anogotem koda tammang liasü, ni kanga junga bilemteter. 1955 küm tetenzüklen, Nagaland nung atalokbatem India atena alir bendanger shinga nema reprangdangtsü memela, alima ajak pi mapatong nung mazüngi alidang, Nagaland-bo tepuokdak takdangang ka aküm.” (Ref: Nagaland Church and Politics. Rev. V.K Nuh).
Iba ama tensa kanga mejungi aliba mapang ka , Naga Peoples Convention (NPC) 1957 küm tentet. “Teshimtet nubu 1735 shi Naga Hills aser Tuensang Frontier Agency kübok kin 16 (tertrok) nungi Kohima nung 1957 küm August 22 nungi 26 tashi sentepa Naga lima nung tekeratiba nung teti asoshi yimjung, telongjem aser teputep adokdaktsütsü ta asüba tebilemtsü ken o benoka jembitep. Iba telongjem senden dang ya Naga Peoples Convention (NPC) ta jatet.” (Ref: Naga Peoples Convention and 16 Point Agreement. S.C.Jamir).
Angatetba agi, NPC ajanga inyakbatem ya Naga undergroundtemi khenyongi magizük kechiyong parnoki Nagaland state akümtsü atema 16 Point renemer agütsütsü asoshi temelaba kodanga magütsü. Sakasa, NPC lenirtemi parnok mapatem anema apusoba aser timtem ajak tizükteta inyaker külen July 1960 nung India den ken o 16 nung tezüngzüktep yanglu aser iba dangji 16 Point Agreement ta ajatsü tenzük. Suiren aser yimsüsübaren züluoka ayuba otsü nungi angatettsü agi, 16 Point Agreement tamendakdakji 16 Point Draft Memorandum lir, koba Naga kintem 16(tertrok) nungi teshimtet nubutemi 3 buba Naga Peoples Convention (NPC) Mokokchung town nung 1959 küm 22nd nungi 26th October anogo tashi akadang obang ka ser agizük, aser iba sülen India Prime Minister nem agütsü. Naga Peoples Convention Delegatetemi 26th July 1960 nung Prime Minister madang yutsüba kenotem tesüsa 27th and 28th July 1960 nung delegation jagi Foreign Secretary Govt. of India den o lemsatepa renemshi.(Ref: Legal Opinion and Interpretation of Article 371A(1)(a) of the Constitution of India and related documents, Govt. of Nagaland, Dept. of Justice and Law). Iba mapang India ato kilonser Nehru-i Lok sabha nung 16 Point Agreement dak sentakba onüktem ajak rateta shia metetdaktsü dang,pai ashiba o kaji yamai liasü ; “Iba Salang (Lok Sabha) yagi hai ta süra 16 Point Agreement ya India Temzüng nung shilem ka akümtsü. Ya India Temzüng nung shilem ka kümra 16 Point Agreement ji anentsü. (Ref: Parliamentary Debates). Iba yagi asenok nem angatetdaktsür, 16 Point Agreement nungi koba onüktemsa Article 371 A nung inoka lir, itemji tang temzüng ozüng kümogo aser tanüngba koba onüktemsa meinok, itemjibo India Temzüng nung Article 371 A latetba anogo nungi temzüng ozüng masü kümogo. Tang tashi nung reprangtetba agi, 16 Point Agreement nung aliba onük karbo tang tashi India government aser Nagaland State napronglai mapa küma inyaktsüsa temulung agüja mali.

Article 371A, Nagaland State atema balaka agütsüba ya Constitution (13th Amendment) Act, 1962 ajanga India temzüng Part XXI nung inok, aser 16 Point Agreement mapa küma, Nagaland State ya Indian Union kübok state 16 buba Nagaland Act, 1962 (Act No. 27 of 1962) ajanga kümtet. Idaki peta metettsüji Article 371 A ya jenjang balaka nung agütsütsü tebilemba nung latetba lir, kechiyong “Balaka” ta asüba ojang ya India Temzüng Part XXI nungjisa agüja lir.
Article 371A . Nagaland State atema balaka latettsübatem :
(1) Iba Temzüng nung kechisa lateta lidir liaka,
(a) Nagaland Legislative Assembly nung bangzüng ajanga telemtetba magi tashibo, Parliament nung latetba kecha agia Nagaland state nung item inyakyim kecha nunga mekongshitsü :
* Naga nunger tamangba yimsüren mesüra loktiliba inyaksangshitem,
* Naga nunger akhi temzüng ozüng aser latetyim,
* Yimten yimsüsüba aser ozüng raksartem ken o bendangba, kobasa Naga nunger akhi temzüng ozüng ajanga telemtetba agir,
* Ali aser idakji keta aliba rongsen madak kibur akümba aser belentepba.

Article 371 A pasalang züngdangba agi Naga nunger dak sentakba tamangba yimsüren, loktiliba aser akhi temzüng ozüng benshibayim indang teratet mesüra tetezü kecha agüja mangur. Iba yagi mezüngyongi keta aliba medokmeperi ka lir, koba ajanga Article 371 A mapa küma benshitsüba nung timtem aser temangmang ajurur. Naga nunger akhibenshi (customary law and procedures) ozüngtemji tapu aika aser Naga nungertem rangben asoshi tamangba yimsüren, loktiren aser akhibenshi inyaksangshitem alakteta lateta yua mali. Aji oda, kin tapu balala rongnung tebilemtsü alibajibo yutsür Naga nunger akhibenshi ozüng aser latetyiji yimtsüng o yimtsüng na tsüngdaa balala lir. Iba jagi Nagaland State nung alir kin shia asoshi külem akhibenshi ozüngtem amshitsüji khenyongi tamakoktsü lir. Iba ama temzüng ozüng ka terasa aser tetezü tejangja agüja maliba yagi India government nem parnok ajunglen asaa aser par kisüng mulungi Article 371 A rateteta amshitsüsa tashi sademsadema agütsür. Ano iba onük nung timtem ka ajitetbaji, Nagaland Legislative Assembly nem Article 371 A nung temeten balaka agüja aliba onüktem nung telemtetba agitsüsa tejangja tashi kecha agüja mali. Tatishitsü tajung kaji, 26th July 2010 nung Nagaland Legislative Assembly-i ali madak kibur akümba aser ali belentepba aser ali dak aketbatem den sentaktep indang pangzüng renem, saka Govt. of India Ministry of Home Affairs nungi iba anema anogo 23rd May 2013 New Delhi nung Office Memorandum ka adok. Iba memorandum nung yamai shia lir, “Article 371 A (a)-i Nagaland Legislative Assembly nem mineral oil dak aketba maparen nung telemtetba agitsü asoshi tashi agüja mali. Kobasa List-1 of the Seventh Schedule of the Constitution kubok aiter entry 53 of List-1 dena item dak sentakba nung ozüng yanglutsü tashiji Parliament dak dang keta lir. Anungji, Nagaland Legislative Assembly-i July 2016 nung pangzüng renembaji temzüng anema aser tagitsü masütsü.” Iba Office Memorandum (OM) anema ya Govt. of Nagaland-i ken o kecha mebenok. Ajitetbaji, iba OM ya India government-i ashiba amaji terenem kümra, Article 371 A dak ya kecha temzüng ozüng asütsüsa tashi mali kümogo, anungji kecha tenüngdaktsü makaba ka akümer. Article 371A nung agütsübatem nung ozüng latettsü Nagaland Legislative Assembly dak tashi alibaji Govt. of India-i tepdokra, Nagaland Legislative Assembly-i latetettsü tashiji List III in the Seventh Schedule, koba dang State List ta ajar, nung züluoka aliba nung tang latettsü ozüngi melatsü, aser ya Temzüng nung Article 245 aliba den sümedema asütsü, aser ano ya Article 246, 247 aser 248 den repa züngsemtsü. Iba renemtet yagi Nagaland State koba yimten jenjang balaka nung haihaura katepa tezüluba ajanga kümtet, ibaji tanga Indian Union nung statetem, koba tangarbo India Temzüng Article 3 nung States Reorganisation Commission ajanga kümtet, item den saku kümdaktsütsü.
Tapet okaba ka, “Temjenkaba Vs Temjenwati(AIR 1992 Gau 8,1991(2) Gau LR 200) nung ashiba agi, keno benokertemi India temzüng Article 371 A nung aliba ama Nagaland Legislative Assembly nunh bangzüng küma melatet tashibo Parliament nung lemtetba kecha agia Naga nunger yimten yimsüsüba aser ozüng raksaba madak obendang agütsüba maparen nung kongshitsü makok ta leteta lir aser Nagaland Legislative Assembly nung Limitation Act of 1963 ji Nagaland nunga benshitsü akok ta lateta maka, anungji iba ozüngji Nagaland nung mamshitettsü ta benok. Ajisüaka, Hon’ble Gauhati High Court ajanga Limitation Act 1963 yagi Naga nung akhi yimsüsüba temzüng ozüng indang kecha shia mali, aser iba yagi Article 371 A dak mekongshir, anungji iba ozüng ya Nagaland nung amshitettsü ta obendang agütsü. Inyaka aruba ajak nung reprangtetbaji, Article 371 A nung shia aliba temetentem balaka agüja alibatemji wazüka aser kümzüka meyutetter saka meilongi India government-i mulungba nung 16 Point Agreement, 1960 aser Article 371 A ya meilongi remzüka odagi. Tejashitsü kaji, India government-i Article 371A nung agütsübatem ya par kisung mulungtet agi mapang ajak nung amokbanga atsüngdoker aser raksatsür aser iba sülenji Naga Legislative Assembly nung amener tatartemi meteta aser memeteti kümsa küm anidaka arudar. Nagaland Assembly nung tatartem temulung ka ser Article 371 A remzüka oa aliba ya India government den arsangokja ken o lemteptsü mapang tongja tongogo, ibaibo kheni mepaidoktetba nüngdak, rongtak tata teinyaktsü ka lir. Nagaland State ya mapang telemtet ka melii India Government-i lemtetba dak dang nendaker alitsü makok. Naga nungertem joko pei telongtet nung tang peisasa yimsüsüa aliba yimtsüngtem nung alir masü. Joko maparen ajak nung Nagaland aser par nüburtema tain kümogo. Joko,tanübo Naga nungertema alima rangpen nung tangar yimsoshia aliba nüburtem den liromedema nokdaktettsü.

(Ibai tezüluri bilemba aser angatetbatem dang lir, anungji yimten telok kati bilemba aser angatetba den kasasa mebilemdaktsüner.)