Arunachal sorkari tasür kibong aser yirua alirtem yaritsü

Itanagar, February 25 (Agencies): Itanagar nung mepetmesü adokdang nisung asem asüba kibong shia nem sen lakh 20 teyari agütsütsü ta Arunachal Pradesh chief minister Pema Khandu-i tanü metetdaktsü.
Non-Arunachali scheduled tribe 6 nem permanent resident certificate (PRC) agütsütsü asoshi inyakba mapa anema nisungtemi lungkak ait.
Pema Khandu-isa tasür kibong shia nungi züngsem ka ka nem sorkar mapa agütsütsü nangzük.
Paisa lungkak aitba mapang nung yirur shia nem sen lakh 10 tashi teyari agütsütsü ta metetdaktsü.
PRC onük shibangogo saka tang lungkak aitba yimya melenshiba atema süngmanger, ta Khandu-isa shisem.
State sorkari Permanent Residency Certificates (PRC) indang onük joko mebenoktsü ta nangzükaka lungkak aitba manener.
Lungkak aitertemi chief minister aser deputy chief minister naprongi tenüng agia menden toktsütsüla ta akhanger. Parnokisa chief secretary mapa belentsü aser police-i pua alirtem tekaratiba nung chiokang ta takhangba agütsür.
Itanagar aser Naharlagun nung mapang telatet melii curfew ozüng agüja lir aser state kübok tesem ajaklen nungi ozüng alema mapa inyakba osang kecha mali ta tanü Arunachal Pradesh police-i metetdaktsü.
Itanagar aser Naharlagun nung internet services maneni shibanga lir aser shishilembadak melapoker.
Tanü chief minister Khandu-i telok balala jatepa senden ka amendang Nyishi Elite Society, Adi Bane Kebang ama teloktemi shilem agi.
Tanü paisa Cabinet senden ka ayonga amen aser idangji commissioner level inquiry ka asütsü aser sorkar o nija kiojen aser rongsen takoksa anguba osang bushitsü atema luden ka shimtsü telemtetbatem agi.
Arunachal Pradesh sorkari party ajak külem senden ka amentsü ayong saka BJP züngsemtem dak alaka tangar shinga iba senden nung maden.