CRPF kibongtemi IAF airstrikes atema tenüngsang agutsür

Lucknow, February 26 (Agencies): February 14 nü Pulwama nung kiralongrartemi Central Reserve Police Force (CRPF) amakba mapang nung asür sepaitem kibongtemi tanep Indian Air Force (IAF) fighter jets amshia Pakistan occupied Kashmir (PoK) nung kiralongrartem camp amakba atema tenüngsang agütsüogo.
Parnok kiobong aikati, tanep IAF-i kiralongrar camps amakba ajanga parnok jashi terabo süngzükogo, ta ashi.
Unnao nungi Rajwanti-i, “Kiralongrar camp amaktsü atema Ato kilonser Modi-i tetuyuba agutsüba ajanga melung raksar alir tetsütem terabo anisüngzükogo,” ta ashi.
Pulwama nung kiralongrartemi amakdang asür, sepai Ajit Singh tetsü, Ashe-i, kiralongrar kar tepsetba ajanga dangbo iba mapa manentsüla, saka kidanger linük (Pakistan) nung aliba kiralongrartem meshimeshia samatsütsüla, ta ashi.
Asür sepai Ajit Kumar Azad kinüngtsü, Meena-i, India-i ano iba dang nungi tali inyaktsüla; Pakistan sorkari nisung aika tepsetba nangzük nungang la melung anisüngzüktsü, ta ashi.
Laisa, “Ato kilonseri maongka dang agutsüra Army temi pei adianutem tepsetbaji mangyangtettsü,” ta ashi.
Asür sepai Ramesh Yadav tedi tambusang, Rajesh Yadav-i defence forces nem tenüngsang agutsü aser Ato kilonser Modi-i kiralongrartem dang lesson sayuogo, ta tenüngsang agutsü.
Pulwama nung asür, Shyam Babu kinüngtsü, Ruby-i, “Kü taküm sama, February 14 nü kü lima tatembang kati aru. Nisung shinga dak-a kü tia matalokdaktsüner,” ta ashi.
Asür Pradeep Singh’er adianu, Kuldeep-i, “Iba operation atema asenoki mener mebenjungteptsüla saka parnok anema tesashiba inyaktsüla,” ta ashi.
Asür, Avdhesh Kumar Yadav tebu, Haresh Yadav-i, “Iba operation atema ni nüma atanger. Kiralongrar camp anema ano tuluba inyaktsüla. Kiralongrar tebuti, Hafiz Sayeed tepsetba anogo nung tepelatiba asutsü,” ta ashi.