Tripura nung Congress President inyaktsü atema chuba jabaso shim

Agartala, February 26 (Agencies): Congress president Rahul Gandhi-i Tripura chuba jabaso Pradyot Bikram Manikya Debbarman state party President inyaktsü shimogo.
Arishi küm 41 tain Debbarman-i 2008 nungi Congress atema inyaka arur. Taoba Minister aser pungben tashi MLA Birajit Sinha ket nungi pai state party President mapa melenzüktsü.
Debbarman-i Tripura Congress nung working president ama inyaka aruya liasü.
“Akhümtsübua aliba Congress President Rahul Gandhi-i Tripura nung tasen inyaktsü atema Prodyut Deb Barman shim. Taoba Tripura PCC President Birajit Sinha-i mapa tulu inyaktsüba atema party-i pa dang pelar” ta tanü AICC general secretary KC Venugopal-i sangdong ka nung metetdaktsü.
“Kanga pelar Rahul Gandhi. Tripura nung ochi aser timi inyakba politics bener arutsü. Ni anemertem aser medemer ajak dang ni Pradyot ama kasa dang alitsü” ta Debbarman-ia metetdaktsü.
Birajit Sinha-i January 2015 nungi Tripura Pradesh Congress President inyaka aru.
Debbarman tebuji Kirit Bikram Kishore Manikya Debbarman tetsüji Bibhu Kumari Devi liasü. Tenaprongla kümsük aiben atema Congress nungi Lok Sabha MP ama inyaka liasü.
“Ni Tripura nung party asentenshitsü merangtsü. Tain aser lanur lennirtem den party züngsem ajak den longjemer ni akokba tashi inyaktsü” ta Debbarman-i osangbener dang ashi.