Arunachal nung tasürtem atema tenla benden

Miao, February 26 (Agencies): Changlang District nung Tangsa Students Union den telok balalai yasüng Miao nung candlelight rally ka ayonga agi.
Arunachal nung lanur pezü khasetba mangyima aser parnok kibongtem yaritsü atema tenlaba sentongji ayongzüka agi.
“Tasü tait lanur pezüi asenok atema aser tarutsü putu atema taküm bendanga agütsü. Parnoki bendanga agütsüba ajanga Arunachal sorkari nübortem taginüba akhümtsübua State Assembly nung kodanga Permanent Citizen Bill mebenoktsü atema lemtetogo” ta Tangsa Student Union President Sengman Ronrang-i ashi.
“Tasürtem asenok dangi meyipa marutsü saka parnok aseno mulungjang nung teti alitsü. Asenok longjemtsüla aser item tasütait kibongtem yaritsüla, kechiyong parnoki asen tarutsü atema tanü parnok taküm bendanga agütsü” ta Ronrang-isa ashi.
Iba sentong nung Women’s Welfare Society, Yobin Welfare Society, Yobin Youth Association, Galo Welfare Society, Tagin Student Union, Singpho Women Organization, Muklom Elite Society, Singpho Development Society, ketdangsertem, public lennirtem aser arogo lennirtem aden.
“Onoki shinga anema menokdaker. Onoki yimjung aginür. Nübortem taginüba asoshi mebilemdangi telemtetba agiba ajanga lanur pezü taküm sama. Telemtetba shitak agi asübo parnok taküm ya kümzüker lila. Onoki tasürtem mangyimer aser parnok kibongtem den khuret lemsateper” ta tetsür lennir Ms. Pinna Kitnal-ia ashi.
Iba sentong agidak collection box ka ayu aser iba nung nisungtemi peii akokba sen mulungsoa tenla agütsü.
Anogo asemnü tashi tensa kanga mejungi akümba sülen Arunachal nung tensa süngjema arudar.
February 22 nü non Arunchalee nunger nem Permanent Residential Certificate (PRC) agütsütsü telemtetba anema lungkak aitdang police-i lanur ka khasetba ajanga tensa tamajungba aküm.
Iba tatalokba nung tasür kibong shia nem state sorkari sen lakh 20 aser yirua alir shia nem sen lakh 10 agütsütsü osang metetdaktsüogo.