Congress-i Assam nem special status agütsütsü: Rahul

Guwahati, February 26 (Agencies): 2019 Lok Sabha elections sülen Centre nung Congress sorkar arura Assam nem special status tanaben agütsütsü, ta Congress president Rahul Gandhi-i tanü ashi.
Khanapara nung election rally ka nung jembidang Rahul-i “Congress party-i Assam nem Special Status agütsü. Narendra Modi, RSS, BJP-i ibaji Assam nungi agien. Onoki sorkar tashi angudang Assam nem Special Status maneni agütsütsü” ta metetdaktsü.
BJP-i aniba Centre sorkari 2015 küm Assam nungi special category status agien. Special category kübok centrally sponsored schemes nung state indang shilemji 10% dang nungi teimba masü.
BJP sorkari Northeast Industrial Policy agien. Iba ya northeast nung industries ajungkettsü aser mapa adokdaktsütsü atema yangluba liasü, ta Rahul-isa ashi.
“BJP-i Northeast Industrial Policy agien. Ajisüaka, onoki iba ya tanaben meyipa bener arutsü aser shibanga aliba paper mills ajak lapoktsü” ta paisa metetdaktsü.
“Assam nun süngolu mapa inyaker nisung 150 dak tema taküm sama. Assam nung BJP sorkar mashimemetetba agi nisungtem taküm lalur” ta Congress president-isa shisem.
“Modi-i Assam süngolu aser idakji mapa inyakertem asoshi mapa aika inyaktsütsü ta nangzük saka kecha meinyak. Onoki süngolu nung mapa inyaker nem minimum wage agütsütsü. Ni nangzükba ajak inyaktsüogo aser iba ya-a inyaktsütsü” ta Rahul-isa ashi.
Congress sorkar arura NRC nung India senso ka danga mezüngdoktsü, ta paisa nangzük.
“NRC mapa tashishitsü keta inyakba, NRC ketdangsertem election nüboyimba maparen nung senzüdaktsüna aser NRC nung India senso kibong meyirjang aika medendaktsütsü ajanga Modi’er sorkari political tangatetba nung iba mapa inyakba sayur. NRC nung India senso ka danga mezüngdoktsü” ta paisa ashi.
Northeast nung RSS-i putiotsü, oshi aser libaliro anema inyaktsü meranger aser RSS tangatetba ajanga Northeast state tem raksatsüogo. BJP-i NRC aser Assam Accord mapa küma inyaktsü sentong kecha mali, ta Rahul Gandhi-isa shisem.
“Citizenship (Amendment) Bill ajanga ozüng alema arur nem senso agütsütsü ta ashiba ajanga BJP-i NRC aser Assam Accord mapa küma inyaktsü tebilemba kecha mali ta sayur. Parnoki Northeast nung vote bank politics dang inyaker” ta paisa shisem.
“Tanü Northeast nung tensa mejungi akümbaji Citizenship Amendment Bill ajanga lir. Iba ya Northeast anema lir. Congress party-i Rajya Sabha nung iba Bill noktang. Nenoki onok aginüdang, onoki nenok den külemi noktak” ta paisa shisem.
Arunachal nung yirurtem den ajurutep
Tanü Congress president Rahul-isa Guwahati nung aliba Apollo Hospital nung Arunachal Pradesh lendong nung yirurtem semdang.
LGB International Airport atongba sülen pai tamasa hospital-i ao aser shiranger yaritepertem den ajurutepa sensaksem.
Iba mapang Assam Congress president Ripun Bora aser Arunachal Pradesh Congress president Takbam Sanjoy na den Congress lennirtem Harish Rawat o Rockybul Hussain nungertemi Rahul meina ao.