CSR Forum workshop sentong takok ngua agiogo

Dimapur, Tsüklai/February 26 (TYO): Guwahati kübok Taj Vivanta nung February 26, 2019 Mongolbarnü Northeast Corporate Social Responsibility (CSR) forum indang workshop sentong ayonga agiba mapang Investment & Development Authority of Nagaland (IDAN) CEO, Alemtemshi Jamir tongti tesemdanger ama dena liasü.
Iba sentong nung tongti tesemdanger o jembidang Alemtemshi-i Northeast State ajunga nung corporate tem dang, nükjidong yur lokti nem tajung meyipa agütsütsüla, aji asünungang nübur taküm nung temelenshi aliba den külemi asen meküta aliba libajen kümzüka aser wazüka yutettsü, ta ashi.
Iba Forum sentong ya Dalmia Foundation-i ayongzüka liasü aser Northeast ajunga nungi corporate tem aruagi shilem agiogo. Sentong nung corporate balala nungi CSR lennirtemi Northeast state ajak nung CSR amenoka tenzüka aotsü asoshi olemtep agia liasü.