DCCI aser EDBA nati NCD, DUCCF aser GB Union pusemer

Dimapur, February 26 (TYO): Dimapur nung NSCN (IM)-i Amongnü/Deobar dokan shibangdaktsüba ozüng agientsü atema Naga Council Dimapur (NCD), Dimapur Urban Colony Chairman Federation (DUCCF) aser GB Union Dimapur-i akhangba onük nung Dimapur Chamber of Commerce and Industry (DCCI) aser East Dimapur Business Association (EDBA) nati parnok nungita pusemer, ta DCCI aser EDBA nati sangdong ka ajanga metetdaktsü.
Amongnü dokantem shibangba sülen association anati (DCCI aser EDBA) tamalen anaben tashi NSCN-UT-1 CAO ajurua food joints, confectioneries, medicine, groceries, raksatsüsa aliba chiyungtsütem aser travel & tour agencies nokdangba agientsüla, kechiyong ibaji ajanga shishilembartem, ainlen senzürtem aser nüburtemi timtem ajurur, ta shia mepishia liasü.
Yamaji CAO-UT 1-i telangzüba tajung agüja mozü dokan, confectionaries, travel agencies aser lodging hotels lapoktsü temelaba agutsü. Ajisüaka tetuyuba junga mejangjaba ajanga ratamata aika liasü aser nisung tamajungertemi Amongnü dokan lapokba nokdangba nungi maongka agia mapang shia shishilembartem amokmerener, ta kasa sangong nung shia lir.
Iba dak alia tanga business/shishilembaba dak sendakba nung CAO-i associations ana dang, Home Kilonser nungi tetuyuba junga agutsütsü ta metetdaktsü, ajisüaka tang tashi nung shishialembartem nem telemtetba agibajia memetetdaktsü, ibayongji shishilembartem mepelar, ta sangdong nung shia alir.
“Khristan state ka ama NSCN (IM)-i Amongnü dokantem shibangdaktsüba nükjidongji junger aser DCCI aser EDBA nati pelaa agizüker, ajisüaka Dimapur ya Nagaland indang shishilembaba tiyongtsü ka lir, aser yangi temeyoktep nisung aika adenshia alir, anungji Amongnü dokan shibangdaktsüba ya mapa küma meinyakteter aser Nagaland nungi nisung meyirjang aikati Amongnü anasa aliba Assam nung jilatemi shishilembai aoba menokdangteter, aser ibaji ajanga saru nung takoksa jenti anguba den külemi melamela raksaba aonsotsü shishirtem takoksa angur aser public/consumers-i timtem ajurur,” ta parnokisa metetdaktsü.
Iba dak sendakba nung associations anati maneni NSCN(IM) dang Amongnü shia aliba trade/businesses nokdangba agientsü mepishir, ta parnokisa metetdaktsü.