NCW-i Chennai nung Northeast nungi nüburtem semdang

Dimapur/Chennai, Tsüklai/February 26 (TYO): February 23, 2019 nü NCW nung züngsem aser Northeast, Tamilnadu, Andra Pradesh, Telangana states atema incharge, Soso Shaiza-i Tamilnadu State Planning Commission Conference Hall nung senden ka ayonga amen.
Iba senden ya North East India Welfare Association Chennai (NEIWAC) aser Tamilnadu State Commission for Women (TNSCW) nati senteper ayongzük.
Senden nung Soso Shaiza-i NCW indang mapatem aser parnoki linük yangerba nung shilem agiba indang metetdakja liasü.
Laisa Northeast nungi aruba nisungtem dang pei inyakba mapa balala mesüra shisaliok bushiba nung kanga nendaka inyaktsü ayongzüka liasü.
Laisa Chennai nung aliba Northeast nisungtem kümzüka alitsü aser tetsürtem tashi atema akokba tashi inyaktsü, ta nangzük.
TNSCW Chairperson, Dr. Kannagi Packianathan, IAS-i Chennai nung tetsürtem anema inyakba aibelen balala indang metetdaktsü aser yimti nung ‘teinyaktsü aser meinyaktsütem’ metetdakja liasü.
Kasa sentong nung NEIWAC President, Wapangtoshi-i NCW dang tebilemba onük pezü benok, aser item rongnung- Northeast helpline ka nüngdakba, Northeast nungi tetsürtem atema hostel ka nüngdakba, nüburtem nem angatetdaktsütsü aser unorganised sector nung mapa inyaktsü atema mapa inyaki mapusodang job card /License agutsütsü asoshi northeast nung Employment Exchange Office aliba district shia nung cell kaka lapoktsü, aser NCW o TNSCW nati Chennai nung tetsürtem reju ajak semdanga Northeast nungi maongka junga manguba tetsürtem nem angati shisaliok agutsütsütsü atema inyaktsü benoka liasü.
Paisa Tamilnadu sorkari state police department ajanga Chennai nung Northeast nisungtem yariba atema pelaba lemsatep.
Iba senden nung TNSCW züngsemtem aden aser parnok rongnung Chennai city police incharge of Women, Radhika, IPS aser Northeast nüburtem dena liasü.