Naga Hoho & NSF-i RN Ravi den majuruteptsü

Kohima, February 26 (TYO): Taoba Prime Minister AB Vajpayee-i Indo-Naga tebilemtsü bentettsü atema mapa inyaktsü tenzükba ajanga Naga nungeri BJP lennirtem dak temulung lema liasü saka parnoki ashioktsüogo ta Naga Hoho-i tanü metetdaktsü.
Narendra Modi-i prime minister inyaktsü tenzükli nungi Naga nunger dang ita 18 tsüngda Naga yimten lattettsü ta nangzük saka ita 60 süia arur, ta parnokisa ashi.
Iba atema taoba state general elections magidang Naga civil society, kin Hoho tem, NNPGs aser political party temi election magidang yimten latet ang ta takhangba agütsü. Ajisüaka, Centre nung BJP-i aniba sorkari Tam Madhav ajanga “Election for solution” yimyim ayimoktsü, ta Naga Hoho-isa shisem.
RN Ravi-i IB Director ama inyakdang züluba ocettem nung ajemdaker India sorkari pa Interlocutor tasen inyaktsü shimba Naga Hoho-i memulungi liasü. Ajisüaka, 2014 küm Nagaland nung RN Ravi den mezüng ajurutepdang pai Indo-Naga yimten tebilemtsü atema nendanga inyaktsü ta onoki angajem, ta Communication Cell, NH-i ashi.
Tesüiba küm 5 tashi pa den olemtepa arudang pai onok dang ‘Naga khuret ka aser yimten onük ka lir. Yimjung olemtep tatembangleni arudar aser onük ajak mulungtepogo” ta ashi. Ajisüaka, BJP-i tawa tu Lok Sabha election sülen ang Naga yimten latettsü ta sangoktsü,
Nagaland atema BJP indang Governor P.B Acharya-i mapang shia yimten olemtep tatemer ta ashi aser March, 2018 nungbo pai ita 6 tsüngda Naga yimten latettsü ta ashi saka ibaji tiyazü liasü, ta Naga Hoho-i ashi.
Anungji, Naga Hoho-i India sorkar dang jashir ta sayutsü atema February 26, 2019 nü Interlocutor RN Ravi den senden amentsü ayongba nung madentsü lemtet. Iba ama tongtipang mapang nung Naga nunger telok ajaki Naga Hoho-i lemtetba sülen anidaktsü imlar, ta Communication Cell-isa metetdaktsü.
Naga Students’ Federation (NSF)-i küm aika Indo-Naga yimjung mapa posema yaritepa arur, ajisüaka tanü India sorkari iba tebilemtsü atema nendaka meinyakba angudang kanga ratar, ta NSF-i ashi.
Prime Minister Narendra Modi lenisüba kübok sorkar akümba aser GOI Interlocutor R N Ravi-i mapa inyaktsü tenzükba sülen Naga aser India nungertemi Indo-Naga yimten tebilemtsü koktettsü ta teimla tasen ka ayu aser imlaa liasü. Ajisüaka, tanü tashi mapa kecha balaka meinyak aser India sorkari o jembiba ama dang ka lir, ta NSF-isa metetdaktsü.
Indo-Naga yimten tebilemtsü ya Naga nunger atema dang masü saka India nunger atemaa tongtipang lir. Anungji, item onük nung ajemdaker GOI Interlocutor for Naga Peace R N Ravi-i February 26 & 27 anogotem ayongba sendentem nung NSF-i madentsü lemtet, ta ketdangpurtemi ashi.