Rajnath-i BSF dang kümküma alitsü tuyu

New Delhi, February 27 (Agencies): Tanü Union Home Minister, Rajnath Singh-i arrtsü anükba sepaitem, talisa BSF dang India-Pakistan arrtsülen kanga kümküma alitsü tuyuba agutsüba den külemi Pakistan-i ceasefire ozüng alema inyakra mesüra injang yokra meyipjang, ta tuyuogo.
Tanü Rajnath Singh leniba nung high-level security review senden ka amenba sülen home ministry nungi ketdangser kati ashiba agi, Jammu region kübok arrtsülen aliba yimtsüngtem nung kanga kümküma alitsü metetdaktsü; BSF sepaitem dang Pakistan sepaitemi injang yokra ibaji meyiptsütsü tuyu aser India nung rara adokdaktsütsü atema kiralongrartemi arrtsü adena aittsü aliba nokdangtsü tuyu.
Tanü security review senden nung NSA Ajit Kumar Doval, BSF aser CRPF densema Central para-military forces nungi DGs, Intelligence Bureau aser R&AW nungi tongti ketdangsertem aser security establishment nungi ketdangsertem dena liasü.
Ketdangser kati, “Tangbo tensa azüokteta lir, ajisüaka arrtsülen nungi injang yokra arrtsülen alirtem jenokdaktsütsü atema anasa aliba bunkers-i parnok anir aotsü asoshi inyakdar,” ta metetdaktsü.
Pakistan tsütsülen nungi injang aser shells yokdang Jammu region nung arrtsülen alirtem jenokdaktsütsü atema Home Ministry-i bunker 14,000 yangludar.