Manipur nung Rohingya nunger 79 apu

Imphal, February 27 (Agencies): Rohingya nunger 79 tashi kuli kaket melii Manipur telungi aitba atema puogo, ta Bodbarnü Chief Minister N. Biren Singh-i ashi.
Manipur Assembly nung Congress MLA K. Ranjit-i tasüngdangba ka langzüdang Biren-i iba osang metetdaktsü.
Rohingya nunger 27 tashi Foreigners’ Act kübok tepuokdak yua lir aser tanüngbatem chiokogo, ta paisa ashi.
“Rohingya nungertemi Myanmar nungi Moreh ajanga aser tanga northeast state tem nungi Jiri jila ajanga Manipur telungi ait. Rohingya nungertem aputsü atema security akangshiang ta onoki tetuyuba agütsüogo” ta Chief Minister-isa ashi.
Manipur sorkari Centre dang Assam nung yangluba ama state nunga National Register of Citizens ka yanglutsü atema asüngdangogo. Iba ajanga police-i bendangertem jangjatsü aser aputsü, ta Biren-isa shisem.
Manipur nung Rohingya nunger apuba ya 2012 nungi tenzük. Iba mapang Rohingya nunger 32 apu aser 2018 nunga state nung bendanger 38 tashi pua liasü.