Tang linük tensa atema opposition party nungi lenirtem senden amen

New Delhi, February 27 (Agencies): Tang linük security tensa atema o lemteptsü asoshi tanü Parliament Library Building nung opposition party temi kanga tongtibang senden ka amen, ta osang ka ajanga metetdaktsü.
Tanü iba senden nung adener opposition party balala nungi lenirtemi, parnoki armed forces nungiter aser tanep samaba pilot atema tebilemtsü akar, ta metetdaktsü.
Parnokisa, armed forces sepaitemi taküm tenla agutsüba nungi BJP lenirtemi yimtenren aitdaktsür, ta aitsü.
Iba ama tensa ka nung sorkari opposition mejaokba aija opposition party temi, “Asen democracy linük ka nung party ajak senden ayongzüktsüla, ajisüaka tesasatsüka Ato kilonseri iba senden mayongzük,” ta metetdaktsü.
Ajisüaka opposition party temi bangzüng ka renema- “iba ama mapang nung opposition-i linük den nokdaktsü aser tsükchir anema nokdaktsü,” ta metetdaktsü.
Iba senden nung adenertem rongnung taoba mapang Ato kilonser, Manmohan Singh, Congress Tir, Rahul Gandhi, UPA Chairperson Sonia Gandhi, West Bengal chief minister aser TMC tongti, Mamata Banerjee, Andhra Pradesh Chief Minister aser TDP Tir, Chandrababu Naidu, Loktantrik Janta Dal lenir Sharad Yadav, NCP tongti Sharad Pawar aser NCP lenir, Praful Patel nunger dena liasü.
Kasa senden nung CPM General Secretary Sitaram Yechury, BSP lenir Satish Chandra Mishra, JDU nungi Upendra Kushwaha, taoba Bihar CM Jitan Ram Manjhi, Congress lenir ana- Ahmed Patel, Ghulam Nabi Azad, CPI nungi Sudhakar Reddy, JDS nungi Danish Ali, DMK nungi Tiruchi Siva aser AAP lenir, Sanjay Singh nungera aden.
Iba senden nung Samajwadi Party bo maden.
Opposition party temi Mongolbarnü Common Minimum Programme (CMP) renemtsü atema senden amentsü liasü, ajisüaka tang linük security tensa ajanga iba sendenji thinenogo.