Assam nung HSLC tatidang agütsür 74 meindok

Guwahati, February 27 (Agencies): Assam nung tang tagidak High School Leaving Certificate (HSLC) tatidang nung kaketshir 74 tashi tim masüba mapa inyakba atema meindok.
Iba ya Hailakandi district nung atalok aser tatidang magütsüdaktsür rongnung par 23 Social Science tatidang nung, General Mathematics nung 19, English nung 15 aser Assamese tatidang nung 4 liasü.
Board of Secondary Education Assam (SEBA)-i ketdangsüa agiba HSLC tatidang tim mesüi mapa inyakba kaketshirtemji Public HS School, Sanarei Mitei HS School, Algapur Public HS School, Janaki Charan HS School, Chalmars HS School aser Hailakandi Town High Madrassa nungi liasü.
Maneni, Hailakandi district nung invigilator 2-i mapa shitak meinyakba atema show-cause notices agütsüogo.
District nung Inspector of Schools Rajiv Kumar Jha-i ashiba agi, HSLC tatidang nung tim masüba mapa meinyakdaktsütsü atema inyakyim aika tenzük.
Hailakandi district administration-i flying squads tentet, supervising officers mapa lemzüktsü aser tatidang agiba centre nung metre 200 telongtet nung Code of Criminal Procedure (CrPC) nung Section 144 ozüng agütü, ta Jha-i metetdaktsü.