Dimapur nung awareness drive ayonga agiogo

Dimapur, Tsüklai/February 27 (TYO): Dimapur jila nung February 27, 2019 Bodbarnü two-wheeler akar ajak atema Helmet amshitsü asoshi Dimapur district Scouts, Cubs & Bulbuls 170 shii agi awareness campaign sentong ka ayongzüka liasü.
Awareness drive sentong ya scouts, cubs aser bulbuls temi City Tower junction nungi tenzüka Deluxe Point tashi sema senzü. Iba mapang parnoki two-wheeler nung mener senzüsenpongertemi helmet semoktsüji kanga dang tongtibang aser lenmang nung lendong ajurudang helmet ajanga taküm kümzüba indang rasa ashi.
Iba campaign sentong ya India HSG den National Training Commissioner, Secretary M. Gnana Nirmala-i anir agia liasü. Iba awareness drive mapang la den Scouter 3 aser Guider 3 densema liasü.
Awareness drive sentong tenzüker tatem tashi security tsütsü nungitba atema Nirmala-i Commissioner of Police, Lima Sunep IPS aser Police Officers nem tenüngsang agütsü. Iba den külemi, Kumari Munesh IPS, Institutions nung tekolak aser tsüraburtemi iba campaign pusema aser ajunghsiba asoshi, Nirmala-i alaktetta tenüngsang agüja liasü.