Sekrenyi mini Hornbill festival tembangogo

Kohima, Tsüklai/February 27, 2019: Kohima kübok Tuophema yimtsüng nung February 27 Bodbarnü Sekrenyi Mini Hornbill benjungmung tatembangbuba sentong nung Advisor, Neikiesalie Kire-i o jembiba yangi noksa nung angur. 

Kohima, Tsüklai/February 27 (TYO): Kohima kübok Tuophema yimtsüng nung February 27, 2019 Bodbarnü Sekrenyi mini Hornbill festival benjungmong anogo tasembuba aser tatembangbuba sentong takok ngua agia liasü. Iba benjungmong tatembangbuba sentong nung Advisor for Rural Development, Dr. Neikiesalie Kire tongti tesemdanger ama aruagi denogo.
Sentong nung jembiba mapang Neikesalie-i, Nagaland state nung aliba kin balala ajunga indang festival ajungkettsütsü nükjidong nung mini Hornbill festival sentong amonger. Saisapong aser benjong balala nungang rangloker senotsü amshiba atema opposition party-i aitsür, ta ashi.
Ajakibosa sorkar mapa menguteter asüngji tanga wadang balala nung pei sasa meranga mapa bushia inyaktsü asoshi sorkari ajungshir, ta asüba olen ka den “Asen Naga nungeri martial arts, tetsür football aser music tsütsü shilem junga agir ajiasünung tarutsü atema item wadang nung mongin küma asen ajangzüktettsüsa bilema inyaktsüla,” ta paisa ashi.
Iba mini Hornbill festival benjungmung sentong nung bendanger aruagi adenba atema Neikiesalie-i parnok dang pela metetdaktsü. Iba den külemi taküm küm December nung agitsü aliba Hornbill festival benjungmung tongtibangtiba nung aruagi adentsü asoshi paisa bendangertem pelashishia jaoka liasü.
Tesüiba kümtem nung asen tetsü tebou koma liyonga aru, item otsüji asen chitnurtem dang sayutsüla ta sahiba den, “Asen chirnurtem ano jungi shisaloik bushitsü atema tanga state balalai yokba ya shisa maka mapa ama ni bilemer kechiyong chirnurtem asen den külemi intetdaktsüba ajanga parnoki sobaliba aser yimya tem nung teti kongshia alitsü,” ta Kire-sa shisem.
Kasa sentong nung Interlocutor, R.N. Ravi-i mapang tatsüka atema semdanga liasü. Iba mapang Ravi-i, Sekrenyi benjungmung reprangshitsüsa mapang tatsüka ngutetba ya maongka ta ashi.
Sekrenyi benjungmung den külemi tanga sobaliba saisapongtem talisa Arr atsütepba, lijak khashishiba, mezüng-tsüktep, greased pole climbing, tetsü-tebo ken aser meyushia arrsangoktsüba tem lemsa agia liasü.
Iba festival sentong nung nübur aika arua adenba dak alaka, Advisor, H. Haying; Advisor, Toshi Wungtung; DC Kohima, Thejagwelie aser sorkar ketdangser tem aruagi dena liasü.
“Purifying Confluence” omen nung ajemdaker agiba mini hornbill festival sentong tatembangbuba nung Sekrenyi Committee Convenor, Neitho-o Kense medendi liasü. Tuophema VC, Chairman, Pfuduolhou Kense-i telok pela agizükba o jembi; Tuophema Cultural Club-i yar-tsüngsanga liasü aser Botsa Cultural Group o Neichütuo & Party nati sobaliba ken ka ka tenloktsü. Angami Sekrenyi mini Hornbill benjungmung sentong nung tongti ketdangserji Chief Minister, Neiphiu Rio liasü.