Longchem nung NDPP 30 Alongtaki A/C wako asongba sentong agiogo

Longchem (Mokokchung), Tsüklai/February 27 (TYO): February 26, 2019 nü Mokokchung district nung Mangkolemba ADC Headquarter kübok Longchem town nung NDPP 30 Alongtaki A/C senyur ki mesemtetba aser party ketdangpurtem agizükba sentong nüngtem nung NDPP 30 Alongtaki A/C puri tang mezüng party wako asongba sentong agiogo, ta NDPP Mokokchung Region Media & Communication-i sangdong ka nung metetdaktsü.
NDPP indang senyur ki Mokokchung Region President N Bendang Jamir-i semzüktsü, aser iba anogomong nüngtem nung pai party wako atsüketa liasü.
Iba sentong nung Mokokchung Region nung party ketdangpurtem aser Party’ Youth aser Women Organizations nungi aden.
30 Alongtaki Assembly constituency ya BJP nungi tang Minister teinyakdak, Temjen Imna Along Longkumer constituency lir, aser tanü party wako asongba ajanga PDA den teloktep nung dena aliba NDPP Constituency ka nung adener.
Iba sentong nung jembidang President-i, wako asongba ya party atema temaitsü aser akhümket lir, anungji party nung inyakertemi party atema kanga nendaka inyaktsüla, aser ibaji pei nija tajangük atema masü saka Naga nunger ajak ajungtsü atema inyaktsüla, ta ashi.
Paisa, yimtenren nung jenjang ajungtsü atema Mokokchung Region asoshi NDPP 30 Alongtaki A/C tentettsü ya kanga tongtibang liasü, ta ashi.
Paisa, tang tasen tentetba party-i tashi angu aser Chief Minister, Neiphiu Rio o Party President, Chingwang Konyak na leniba nung party pongui PDA teloktep sorkar akum, kong BJP ya election magidang nungi NDPP den teloktep lir, ta metetdaktsü.
Party nung inyakertemi akokba tashi sorkar nungittsüla, ta shia pai, Chief Minister Neiphiu Rio aser Party President, Chingwang Konyak na lenisüba kübok mapatong aser sentong balala benoka PDA sorkari Nagaland nung alirtem atema inyaker, ta ashi.
“Tsünglanglen nungi tenzüka party nung inyakertemi sorkar aser party naprongla menungitra party tashi maittsü,” ta pai party nung inyakertem ayongzük.
Bendang Jamir-i, yimtenren nung party-i akokba tashi meranga inyakaka mapang kaka nungbo party-i tamakok angutsü-a akok, kechiyong ibaji politics asayayim nung lir, anungji melung ajema malitsüla saka tarutsü nung iba ama tensaji ajurura koktettsü atema renema alitsüla, ta ashi.
Iba dak sendakba nung pai, tang NDPP 30 Alongtaki Assembly constituency nungi Nagaland Legislative Assembly (NLA) nung tebuti ka mesüka mali, ajisüaka NDPP Mokokchung Region ji nenok atema tebu ka asutsü, aser nenok tebilemtsü onüktem reprangtsü atema kishi lapokja lir, ta metetdaktsü.
Paisa party nung inyakertem dang yimtenren nung tanemertemi asalentongba nung metsüktsüla saka tamasa tim lenmang ajanga asüngdangyaa ochiji jangjatsüla, ta ashi.
Paisa party nung inyakertem dang 2023 küm Nagaland State General Election nung NDPP single largest party ser sorkar akumtsü mangdang yur inyaktsüla, kechiyong single party kati akumba sorkarji nüburtem atema tashitait sorkar ka asür, ta ashi.
Kasa sentong nung NDPP Mokokchung Region senyur, Pangerzulu, President Women Organisation, Chepangla, President Youth Organisation, Bendang Walling aser NDPP 30 Alongtaki A/C senyur, A Lendi Ao nungeria jembia liasü.