Raj Bhavan nung nübur tenzükertem den sentong ka agi ; Meimchir tenzükbaji Tsüngrem tenzükba lir: Angh, Acharya

Kohima, February 27, 2019: Tanü Raj Bhavan Kohima nung Nagaland Angh, P B Acharya-i service providers den jembiba noksa nung angur.

Kohima, February 27 (TYO): Nagaland Angh, PB Acharya-i ayongzüka February 27, 2019 nü Durbar Hall, Raj Bhavan Kohima nung nübur tenzükertem- tsüngsem yanglushitsürtem, kou mejeptsürtem, süoshi shidoktsürtem, aonsotsü ayokertem, sü arrtem, kidang yaritepertem, osangkaket lemtsürtem den shisa lemsatep sentong ka agiogo, ta tanü PRO to Governor sangdong ka nung metetdaktsü.
Angh, Acharya-i, item ama tenzükertemi nüburtemi nüngdakba service balala aguja tenzüker, aser parnok ya asen taküm nung kanga tongtibang, ta ashi.
Pai ashiba agi, parnoki nüngdakba tesemtem nung nüngdakbapur den tongteper, aser parnoki maparen balala nung asenok metenzükra, nüngdak balala atema asenok meta talangi aotsüsa akumer.
Paisa, nisung shingaia pei mapa atema maaktsüla, kechiyong mapa ajakji kasa; meimchir tenzükbaji Tsüngrem tenzükba lir, ta paisa ashi.
Angh-isa parnok dang parnok maparen balala tashi itshitsü atema Central aser State sorkar indang schemes balala nungi tajangzük agitsü atema ajungshi aser service providers atema sorkar welfare schemes aser programmes balala metetdakja liasü.
Nenok nokdaktettsü aser loktiliba tashi itshidaktsütsü nükjidong nung tenzükba schemes aika lir, ta pai metetdaktsü.
Acharya-i sensotem danga service providers-i tenzükba balala atema pelatsüla aser mapa tapu ajak akhümtsübutsüla, ta ayongzükogo.
Kasa sentong nung jembidang Commissioner & Secretary to Governor, Dinesh Kumar, IAS-i, Raj Bhavan Kohima putiotsü nung tang mezüng Angh Acharya aser pa kinüngtsü nati service providers atema iba ama sentong ayongzüka agir, ta ashi.
Paisa, iba sentong ayongzükba tongtibangba nükjidongji nenoki lokti tenzükba atema tetushi agutsütsü aser ajak nem kasa akhümtsübu agutsütsü atema lir, ta ashi.
Paisa, Angh Acharya-i service providers jenjang ajungtsü atema inyakner aser parnok nem facilities aser tajangzük balala, legal tekümzükba aser sorkar welfare schemes den programmes metetdaktsüner, aser lenla ajak nung yariteptsü jangrar, ta ashi.
Iba sentong nung Banking sector nungia ketdangsertem aden, aser parnoki peipei banks nung loan balala aser schemes indang metetdaktsü.
Ano Deputy Director, RSB Rajeev Dong aser Sanuo Vamuzo nungeria jembia liasü.
Iba sentong tembangba sülen Arunachal Pradesh aser Manipur nungi telok balala sobaliba shilem agi aser lokti chiyunga tembang.
Lokti tenzükba atema service providers ajak nem Angh-i sign asüba Certificate of Appreciation aguja liasü.