PDA sorkari ita 11 tsüngda terenlok kecha bener maru: Opposition

Kohima, February 27 (TYO): Nagaland nung tang teinyakdak terenlok mapatem ya taoba NPF-i aniba DAN-III sorkar mapang tenzükbatem lir aser Peoples’ Democratic Alliance (PDA) sorkari terenlok mapa kecha bener maru ta Opposition Naga Peoples’ Front (NPF)-i ashi.
Yashi Budget 2019-20 atema olemtepba mapang TR Zeliang-i ashiba agi “PDA sorkari Road Sector nung Central Project ka danga bener maru aser tang kechi inyakdar, iba ya NPF-i aniba DAN-III sorkar mapang bener aruba lir.”
Ajisüaka, sorkari kechi mapatong bener aru ta asübaji masü saka sorkari mapatongtem koma inyaker ta asüba jiang tongtipang lir, ta Zeliang-isa shisem.
“Budget onük jembidang Chief Minister Neiphiu Rio-i par sorkari lenmangtem tajungba kümdaktsütsü atema temulung agütsütsü ta ashi. Anungji yamaji süra, Rio-i pa sasa aser par MLA tem dang tiyazü tenangzükbatem magii mapa nung ang temulung agütsütsüla,” ta Opposition Leader-isa ashi.
“Taoba ita 11 tashi state ketdangsüa arudang PDA sorkari gari lenmang Project ka danga India sorkar dang nungi memeshitet saka parnoki anüng nungbo chuba kitem yanglur. Parnoki District HQs ajak nung lenmangtem yanglushitsü aser tongtipang gari lenmang ajak anepalutsü atema master plan ka yanglutsü ta nangzük saka ajak tamakok angu” ta TR Zeliang-i shisem’.
Nagaland sorkari Goods and Services Tax (GST) mapa shitak meinyaker kechiyong 2017-18 tsüngda 25% tax sarutet saka 2018-19 tsüngda 11.4% dang saru aser 2019-20 nungbo 9.72% dang sarutettsü ta asadangtetba ashir, ta paisa metetdaktsü.
“Sorkar mapa inyakertem nem itasen agütsüba nung sen aika endokba ajanga terenlok mapa meinyakter ta Chief Minister-i ashibaji shitak aser asenok ano Pension payment tebilemtsü lir.
Anungji state sorkari bogus pensions inyakyim aser tanga tim masüba maparen mita reprangtsüla. Sorkari work charged employees tiptemtsüla kechiyong work charged mapa inyaker aika tiyazü nung sen agizüka agir” ta Opposition Leader-isa ashi.
Kiphire District dak alia Peren, Longleng aser Noklak district tasentem ajungkettsüla aser telemsa meyui sorkari kasa teyari agütsütsüla, ta paisa shisem.
Nagaland nung College ajak NAAC ajanga accredited süogo ta state sorkari ashibaji tiyazü kechiyong November 30, 2018 indang records ajanga accredited list nung Nagaland nungi college ajak dena mali. Külen, Nagaland nung Higher Education system akangshir ta ashir saka Assistant Professors 177 tashi inyakyim lateta aliba ama mesüi mapa nung shimokbaji taoksatsüka lir, ta TR Zeliang-isa metetdaktsü.
Chief Minister-i anir par Cabinet-i Prime Minister Narendra Modi, Union Home Minister Rajnath Singh aser Interlocutor R.N Ravi nunger den aiben ajurutepogo anungji PDA sorkari Indo-Naga yimten tebilemtsü atema kechi mapatemsa inyaka lir’ar metetdaktsütsüla, ta paisa asüngdang.
Iba mapang NPF MLA tem- C L John, Vikheho Swu, Dr Chumben Murry, Yitachu, Kuzholuzo Neinu, Thongwang Konyak, Eshak Konyak, Y M Yollow aser Picto Shohe nungertemi o jembidang PDA sorkar indang yimyim ‘Temelenshi Arudar’ ta asüba tilutsü.
Opposition MLA temisa PDA sorkari sen endoka Naga nungertem Holy Land Tour tenüng nung Hindu Khumbh mela nung adentsü yokba lutsü.
NPF MLA Moatoshi-ia yashi iba olemtep nung shilem tagidak nung tangi mesashiteti akümba agi mozü kidangi anir ao saka pa temang tajungba kümogo ta angazüker.