Pakistan-i IAF Pilot apu; India-i tangsa chiokang ta akhanger

Bodbarnep Pakistan sepaitemi IAF Wing Commander Abhinandan Varthaman apuba sülen pa dak teka sangshiba video ka prokshi saka Pakistan ketdangsertemi iba video ji agienogo.

New Delhi, February 27 (Agencies): Bodbar anepdang Pakistan aser India tsüngda anüng nung tayimtsü amshia raradang Pakistan sepaitemi IAF Wing Commander Abhinandan Varthaman apu.
Ministry of External Affairs-i Pakistan nung acting high commissioner dangi züluba shidi ka nung “Abhinandan Varthaman timtem melii tangsa chioktsü imlar” ta ashi.
Pakistan-i International Humanitarian Law aser Geneva Convention nung telatetba ajak alema yirua aliba pilot mejungi benshiba atema India sorkari aitsü.
“Parnok ket nung Indian defence personnel ayudang Pakistan-i pa nem timtem kecha majurudaktsütsü metetdaktsür” ta sorkarisa metetdaktsü.
Tanep Pakistani tayimtsütemi Indian airspace telungi aitba atema IAF tayimtsütemi parnok noktangtsü merang aser idangji Wing Commander Varthaman indang MiG-21 khazüka yok, ta tanü MEA otongdar Raveesh Kumar-i metetdakja liasü.
Pakistan-i tayimtsütemji India nung mitkar alidak amaktsü atema yok ta India sorkarisa aitsü.
Mongulbar anepdang India-i tayimtsütem amshia Pakistan nung Jaish teseptem amak aser Pakistan-i iba atemaji Air Force ajanga India litsü nung mitkar alidak amaktsü meranger. Onok renema aliba ajanga Pakistan-i mapa inyaktsü merangba noktangtet, ta sorkarisa shisem.
Tanü nikongtsütsü Prime Minister Narendra Modi-i defence forces 3 nung chiefs, National Security Advisor Ajit Doval, Defence aser Foreign Secretary tem aser intelligence ketdangsertem den senden ka amen.
IAF pilot apuba atema Congress president Rahul Gandhi-i anir opposition lennir aikati jashiba osang metetdaktsüogo.
“Asen tasü tait IAF pilot ka samaogo ta osang angashidang temulung raksar. Pa yakta kidangi meyipa arutsü imlar. Iba ama tensa tamajung nung onoki armed forces den külemi noktaka lir” ta Rahul-i ashi.
Külen, DMK lennir M K Stalin-i Centre dang kechi südir süaka Abhinandan kidangi anir arutsü atema mapa inyakang ta ayongzük.
National Conference lennir Omar Abdullah-ia Pakistan dang “onoki nenok sepai ka ozü litsü nung pua inyakdaktsünüba ama nenokia ozü pilot dak-a inyakang” ta ashi.
AIMIM president Asaduddin Owaisi-ia “Pakistan-i Geneva Convention telatetbatem akhümtsübua pilot anepaluang” ta metetdaktsü.
“Linük ajungai iba tasü tait jabaso atema nüma atanger aser ajaki pa meyipa arutsü imlar. Asen linük tashi itta aser lendong nungi kümzüka ayutsü atema onok ajak longjema lir” ta Delhi Chief Minister Arvind Kejriwal-a metetdaktsü.