Bond 25 film nung Rami Malek anioktsü jembidar

Tsüklai/February 28 (Agencies): Cary Joji Fukunaga leniba kübok yanglutsü aliba ‘Bond 25’ film tasenba nung Rami Malek anioktsü atema jembishinüba maparen tatembangleni arudar, ta osang ajanga metetdaktsü.
Daniel Craig-i 007 shilem agitsü aliba installment tasenba nung arishi küm 37 tain Rami nem nisung tamajung shilem agidaktsütsü jembidar. Taküm küm Academy Award sentong agiba mapang ‘Bohemian Rhapsody’ film nung Rami-i Freddie Mercury shilem agiba atema pai Best Actor jenjang nung award anguba ajaki jangjaa lir.
Taoba mapang osangtem ajanga angazükba agi, Bond project tasenba nung anioktsü atema asalentong liasü saka drama series ‘Mr. Robot’ nung Rami mazüngi aliba ajanga khen thinentsü. Ajisüaka, Collider den otongdar ajanga ashiba agi, WME nung Rami’er team-i project anaprongla nung lemsar shilem agitsü tezüngzüktep takok ngua agiogo.
Rami nem iba film atema koba shilem lemzüktsütsü ajibo osang tejangja mali saka olulutem ajanga angazükba agi, pai Bond project tasenba nung nükpoker nisung tamajung shilem agitsü.
‘Bond 25’ installment koba nüngja ‘Shatterhand’ agütsüogo, iba film ya Craig indang pungobuba aser tatembangbuba 007 franchise asütsü aser February 14, 2020 nü sayatsü aliba anogo melenshiba sülen iba film April 8, 2020 nü sayatsü asoshi telemtetba agiogo.
007 franchise tasenba nung Craig den külemi Naomie Harris, Ralph Fiennes aser Lea Seydoux nungeri tanaben pei tata shilem agiba angutsü.
2015 küm sayaba ‘Spectre’ film nung arishi küm 33 tain Lea-i ‘Bond girl’ Dr. Madeleine Swann shilem agiba nguogo aser tang project tasenba nunga Craig o director Fukunaga napronglai pusemba sülen la nem iba shilem lemzüktsüogo.
Project nung ”Creative differences” maparen madak temulung mesüi Danny Boyle-i toktsüba sülen 2018 September ita movie atema director tasen ka shimtsü asoshi aikati Fukunaga tetshia liasü.
”Cary den longjema inyaktsü asoshi pelar. James Bond adventure atema Cary director tetemjem asütsü,” ta producer Michael Wilson aser Barbara Broccoli nati ashi.