Itanagar nung tensa tajungba kümdar: Pema Khandu

Itanagar, February 28 (Agencies): State yimtiba Itanagar nung tensa tajungba kümdar ta Arunachal Pradesh Chief Minister Pema Khandu-i ashi.
Telok balala, non-governmental organisations (NGOs) aser kaketshir tentettemi administration aser police den yaritepba atema kanga pelar, ta Chief Minister Khandu-i metetdaktsü.
Arunachal Chamber of Commerce and Industries-i state yimtiba nung commercial activities tenzükba atem pelar, ta paisa shisem.
Sorkari non-Arunachal Pradesh Scheduled Tribe (APSTs) 6 nem permanent residential certificates (PRCs) agütsütsü shidangba ajanga Arunachal Pradesh nung tensa mejungi aküm.
Lungkak aitertemi gari aika rogdoktsü aser Arunachal Chief Minister’er ki amaktsü merangba den Deputy CM Chowna Mein’er ki rongdoktsü.
Arunachal Pradesh nung non-APST kin 6 ji Deori, Sonowal Kachari, Mishing, Adivasi, Gorkha aser Moran nungertem lir.
Assam nungbo Deori, Sonowal Kachari aser Mishing nungertem Scheduled Tribe (ST) jenjang agüja lir.
Kin trok nem permanent residential certificate (PRC) agütsütsü indang onük atema ozüng alema lungkak aitba sülen tashi kar lir, ta Arunachal Pradesh Chief Minister Khandu-i taoba mapang ashi.
Ajisüaka, state ajungalen aser talisa Itanagar nung tongti süa mepetmesü adokba ajanga Arunachal Pradesh sorkari PRC mapa meinyaktsü ta telemtetba agi.