Teshimtet telok kati yi lendong bushisüngdangtsü

Guwahati, February 28 (Agencies): Golaghat aser Jorhat nung yi nung mim jemsemer asüba ken o bushisüngdangtsü atema Speaker Hitendra Nath Goswami lenisüba kübok party ajak adenba telok ka tentetogo, ta February 28, 2019 nü Assam Legislative Assembly-i metetdaktsü.
Iba teshimtet telok nung leader of the Opposition Debabrata Saikia, Minister of Health and Family Welfare Pijush Hazarika, Labour and Employment minister Pallab Lochan Das, Rockybul Hussain (INC), Brindaban Goswami (AGP), Aminul Islam (AIUDF), Kamalshing Narzary (BPF) aser tangartem dena lir.
Golaghat aser Jorhat district tem nung yi nung mim jemsemer nisung 150 dak tema asü aser ano aika mozü ki balala nung anepaludar.
Iba tatalokba sülen Excise department ketdangsertemi ozüng alema yi yangluba maparen mita aodang nisung 20 dak tema apu.
Taoba Deobarnü Golaghat nung police-i Lalchand Agarwal ta ser nisung ka indang godown mita aodang yi yangludang amshiba jaggery, alum, aser urea tem yua aliba apu.
Shiruru nem agütsütsü yangluba jaggery tamajungi yi yanglur. Golaghat district administration-i timtem ajuruba kibongtem nem jangotsü aser tanga teyaritem agütsür, ta Golaghat Excise department superintendent Shantanu Hazarika-i ashi.
Yi nung methyl alcohol (methanol) enoksemba ajanga nisungtem asü ta Assam state Health and Family Welfare minister Pijush Hazarika-ia yakanü metetdaktsü.