Yimjung temaitsü India nunger IAF Pilot chioktsü: Imran Khan

New Delhi, February 28 (Agencies): Tanü Pakistan nunger Parliament nung Pakistan Ato kilonser, Imran Khan-i, yimjung temaitsü Pakistan linüki pua aliba India nunger IAF pilot Wing Commander, Abhinandan Varthaman asüng (March 1) chioktsü, ta metetdaktsü.
“Onoki yimjung aginer, aser iba temaitsü ni ya sangdonger- ken o jembitsü atema mezüngbuba mera agia asüng Pakistan-i onok ket nung aliba Indian Air Force officer chioktsü,” ta Khan-i metetdaktsü.
Parliament nung züngsem aikati ibaji pelaa agizük.
National Assembly arok senden nung jembidang Khan-i, India-Pakistan tensaji tamajungba mekümdaktsütsüla, mesüra Pakistan-ia mangyangtsüsa akumtsü,” ta metetdaktsü.
“Tangatetba tai ajanga linüktem raksar. Rara ajanga lenmang kecha melapoktsü. India-i anema apusora asenoki-a mangyangtsüsa akumtsü,” ta pai metetdaktsü.
India den tang tensa raksaa aliba atema o lemteptsü atema Parliament senden ya ayongzük.
Khan-i, “Yashi asenoki inyakbaji asenok tashi sayutsü atema dang liasü. Asenoki India nung nisung metepsetnü, kechiyong asenoki khuret lia inyaker,” ta ashi.
Pai ashiba agi, Bodhbarnü pai India Ato kilonser, Narendra Modi den phone ajanga jembitsü merang, kechiyong asenoki aser India-ia tensa tamajungba mekümdaktsüner.
Pakistan Foreign Minister, Shah Mehmood Qureshi-i, India-Pakistan tensa tamajungba mekümdaktsütsü atema Ato kilonser Khan-i Narendra Modi den jembitsüa melunga lir, ta sangdongba sülen mapang tatsüka tsüngda Khan-i iba osang metetdaktsü.