Moreh nung AR-i UNLF cadre ka apu

Imphal, Tsüklai/February 28 (Agencies): Northeast India telungtet nung maneni merang Assam Rifles-i telungpur amakba mapang ka nung, Manipur state kübok Moreh market tesem anasa Assam Rifles-i ano United National Liberation Front (UNLF) nungi telungpur ka pua liasü, ta osang ajanga metetdaktsü.
Manipur state kübok Tengnoupal district nung Moreh ya jila ka koba India aser Myanmar arrtsü tsüngda lir.
Meim osang ka angazükba nung ajemdaker IGAR, 26 Sect Assam Rifles indang Moreh Battalion-i Moreh market mita aoba mapang UNLF telok nungi telungpur ka apu.
Moreh Bn indang vigilance team-i nisungbaji kanga junga ladanga aser telungpur ta jangjaba sülen ang pua liasü ta kasa osang nung shia lir.
“Moreh market anasa IGAR, 26 Sect Assam Rifles indang Moreh Bn-i UNLF cadre ka puogo. Iba nisungji telungpur ta jangjashir sülen vigilant team-i mita pa apu,” ta Twitter ajanga Brihostibarnü Assam Rifles-i pua alisang UNLF cadre noksa ka den külemi lemsatep.
February 14, 2019 nü Ukhrul Bazar, Manipur nuug Thoubal Battalion, 9 Sector Assam Rifles aser Somsai Battalion, 10 Sector Assam Rifles na longjema telungpur ka pua liasü. Parnoki pa apuba mapang pai Improvised Explosive Devices (IEDs) aser bomb yangluba osettem bena liasü.
“Nisung kati bomb yangluba osettem Imphal tesemi shibelentsü atema tasa yangluba osang ka angazükba nung ajemdaker, Ukhrul Bazar tesem nung Assam Rifles team den Police longjema mita liasü; iba mapang parnoki temulung melemi bilemba nisung jagi yangkhu ka azükloker oya aliba ngua apu,” ta Assam Rifles PRO sangdong ka ajanga metetdaktsü.
“Iba yangkhu lapoka reprangdang IEDs aser bomb yangluba osettem ngutet. Pua alisangji Yaoreipam Lashkar aser pa ya Kamjong yimtsüng nungi lir. Lashkar-i bena aliba yangkhu nungjii matongtep aliba IEDs ana, detonator pezü, TNT slab ka aser bomb yangludang amshiba powder densema IEDs asem liasü,” ta PRO sangdong nung shia lir.