Raraba takoksa

Pakistan len aliba Jaish-e-Mohammad ta ajaba kiralongrar teloki Kashmir nung February 14 nü gari aser nisung agi bomb kümer oagi CRPF bus ka nung oa tsüoktsüba lendong nung CRPF sepaitem 40 dak tali pokseta südaktsüba sülen yakanü India-i Pakistan nunger lushi nung kiralongrartem alidak bomb yokbaji mapang shitak ka nung mapa shitak inyakogo. Atangji, India-i bomb tesashi yokbaji Pakistan nunger lushi nung süaka ibaji Pakistan anema masü saka kiralongrartem anema lir. India-i amakba tesem asemji ka Balakot, ka Chakoti aser ka Muzaffarabad liasü. Muzaffarabad yabo Pakistan nungertemi amokbanger aliba Kashmir kübok lir saka tanga tesem anajibo Pakistan kübok lir. Kashmir nung ajungbena kiralongrar ket nung CRPF purtem paikaji asütsüsa atalokba lendongji kenyongi meimlaba lendong ka liasü. Iba ama meimlaba lendong tulu ataloker India nung nübortem jashia alidang, ano meimlaika yakanep India-i Pakistan ken kiralongrar alidak tesep asem tashi makdoka sayuba agi nübortema tejashi terabo anenogo. Atangji, tonga oagi repranga züngdanger masünungji, Indiai kiralongrartem amakba lendong nungji nisung kwi asüar meshitetter saka India-i teinyaktsübo inyakogo. India o Pakistan na ya 1947 küm British nunger yimten talenba nungi nüchiso anguba mapang tamangba yimsü tsütsülen nungi kin ana kümer azütokshia raraba sülen tang tashi nung asemben tashi raraogo. Item rara sülena tang tashi kin ana tsüngda yimjung nung temulung sadoka melitetter. Ibayongji, kin anaprongla nübortem asoshi terenlok mapatem nung endoktsüba rongsen shilem tuluka raraba oset yangluba nung aser tangar bendangertem dang raraba oset aser tayimtsü aliba nung endoker. Tangbo, kin anaprongla ya nuclear tashi amshia raratsüsa renema lir, anungji shitakba kin ana tsüngda ya rara tenzük nungbo, iba rarajibo tulu asütsü aser alima nung tesama aser takoksa tulu alitsü. Ashiko, iba jagi alima tuluka samatsüa akok. Atangji, tang yabo India-i Pakistan lushi nung kiralongrartem aliba amakyonga, nübortem alidak tesembo ka nung danga timtem lendong magütsü. Iba jagi alima kintem dang osang tejangja tajungka metetdaktsür. India-i rarabaji Pakistan anema masü saka kiralongrartem anema rarar asünungji, alima kintemia India nungiter aser Pakistan dang par lushi nung kiralongrar mejenokdaktsütsü asoshi nenshia metetdaktsüogo. India aser Pakistan na meputepba ya tangbo tamangbaren tsütsü masü saka Kashmir ajanga meputeper. Kashmir nunger kari Kashmir-ji India kübok malitsüla ta akanger aser kasaji Pakistan-ia kangdaker. Ibayongji. Kashmir nung rongrong aser lendongtsüdong atalokba manener. Atangji, Jammu & Kashmirbo India küboksa liaka temzüng ozüng balaka lir, anungji India tatar hoho nung jembiba aika Jammu & Kashmir nung mebenshir. Ibaji nüchiso tesadangka agütsü amato lir. Ajisüaka, Kashmir nunger nüjiso bushirtemi Kashmir-ji balaka linür. Iba jagi tang tashi Kashmir yimten temeten jembitsü asoshi nisung aikati telong nung lia kiralongraba mapa inyaker. Item kiralongrar teloktemji Pakistan nung tesem tenteta yur yangji training agir aser mapang mapang shia India nem lendong agütsür. India asoshi dang masü saka alima asoshi lendongji aji lir, ibayongji US aser China-i anir alima kintemi Pakistan dang pei lushi nung kiralongrar telok amenoka alibaji samatsütsüla ta shijen shidagi. Atangji, India-ia raraba osettem sen aika endoka alioka aliyonga rarabo meraranür aser yamaji Pakistan-ia India den raranüa mali, kechiyong raraba oset tulu aser tesashi amshia meraraaka, akhidang amshiba prongpong aser injang amshia dang rara nunga sen aika endoktsü aser iba jagi linük nung ayawaraang jaoktsü. Aji oda, kidanger den teti temulung melemtep aser meputep melii yimjung nung pelatepa alitsü atema, alima kintemi ashiba ama, Pakistan-i par lushi nung kiralongrar tejang kata mayutsüla aser India-ia Jammu & Kashmir yimten tia aser temeten ya khen meyipa reprangdangtsüla.