NDPP tetsürtemi TR Zeliang aitsür

Dimapur, February 28 (TYO): Opposition Leader T. R. Zeliang-i Assembly nung Citizenship (Amendment) Bill 2019 onük jembidang tetsürtem mezüngmeshia jemiba atema aoksar aser jashir ta NDPP Central Women Organisation-i metetdaktsü.
“Tebur kati kibur ana metenzüktettsü. Hao, tebur karibo tetsür ana peladaktsütsü akok saka nisung shingaia kibur ana metenzüktettsü” ta TR Zeliang-i ashi. Tanü alima nung tetsür-tebur kasa ta jembiba mapang ka Opposition Leader-i lanuputu dang tangatetba tamajung ka sayuogo. Asen temeten aser asen akhüm kümzüka ayutsü atema asenoki shimtetba lennirtemi iba amai inyaktsü ta mebilem, ta NDPP Women Organisation-isa ashi.
Iba sangdong ya yimtenren tsütsü masü saka tetsürtem aser talisa Naga tsürtem kümzüka ayutsü atema lir. Nisung shinga nema tetsürtem mezüngmeshi mesüdaktsütsü aser T. R. Zeliang dang Naga loktiliba nung tetsürtemi shilem tajung agiyonga aruba bilemtetdaktsür, ta parnokisa ashi.
Tetsürtemi alu mapa, office, kidang aser politics nunga teburtem yaria arur. Pai pa tetsü, kinungtsü aser jalatemi yariba amadok asütsü akok. Anungji T. R. Zeliang-i assembly nung tetsürtem mezüngmeshia jembiba atema yimjak nung tatok meshitsü akhanger aser tangatetba shitak alirtem ajaki tetsürtem anema jembiba onük aitsütsü ayongzüker, ta NDPP Women Organisation-isa metetdaktsü.