NPF-i PDA sorkar dang mepelar

Dimapur, February 28 (TYO): Tang agiba Assembly session nung PDA MLA kari yimya tamajung benshi aser NPF-i asüngdangba kar Assembly secretariat-i business list nung magizükba den question hour mapang opposition-i asüngdanga aika melangzük mesüra tai langzü, ta Naga People’s Front (NPF)-i tanü ashi.
Opposition-i department ka indang osang metetnüa asüngdanga iba department anepaluba MLA-i masü saka tanga department bena aliba Cabinet Minister temia telangzüba agütsü.
Budget atema olemtepdang NPF Legislature party leader TR Zeliang-i State Planning Minister dang road sector atema osang kar metetnüa asüngdang saka idangji pai Dimapur aser Kohima nung küm 2-3 tsüngda lenmang tajung angutsü aser iba jila ana nung temelenshi ajitettsü ta dang ilangilanga langzü, ta Press Bureau-i metetdaktsü.
Kohima aser Dimapur nung gari lenmang yangluba contractor temi mapa tembangba sülen küm asem tashi anepalutsü ta State Planning Minister-isa ashi aser idangji Opposition Leader-i koba scheme kübok lenmangtem yanglur aser lenmang shia sen kwi lemzüktsü ta asüngdangba den Planning Minister dang osangkakettem nung iba osang sangdongtsü mepishi. Ajisüaka, opposition-i metetnüa asüngdangba osang osangkaket nung madok, ta Press Bureau-isa ashi.
Sorkari state renloktsü atema mapa inyakba nung nendaka inyaktsü metetdaktsür, ta parnokisa shisem.