Tangar atongba (outreach) Kolosi 1:24-29, Osangtajung ketangsüba

Aji asünung, nenoki onok Khrista tenzüker aser Tsüngrem miim O ketdangsür ama züngshiang. 1 Korint 4:1
Kodang asenoki ketangsüba indang bilemer, yimya nung osangtajung ketangsüba indang mebilemer. Yimya agi asenoki mapang, sempet (talent) aser rongsen rizüngba indang bilemer. Saka osangtajung, Tsüngremi Yisu Khrista ajanga inyakba osangtajung indang koda? Pauli iba indang yamai ashir, “Aser ano kü Kibuba Khrista Yisu temetetba tajungtiba asoshi ajak tesama ta ni atangji züngshir” (Fil. 3:8). Osangtajung – Tekümtet osangtajung, Yisu Khrista dak amangba tamang ajanga temenen tatok anguba, aser teti taküm – ali rongsen kechaia atoksatsü makok. Osangtajung asoshi Tsüngrem tenüng sangang!
Saka Tsüngrem nungi anguba iba sempet yagi asenoki kechi inyaker? Pauli asenok dang ashir Tsüngrem miim O ketdangsür kümang, ibaji Khristai asenok dangi bener aruba taochi lir. Na aser ni Tsüngrem miim O Tsüngrem-nisung Yisu Khrista indang tangar den lemsateptsü aja. Iba dang sayutsüngi yim ta ajar. Tsüngrem miim O ketdangsür ka ama nai Yisu Khrista indang kechi metet aji tangar den lemsateptsüla. Kong? Kidang, mapa nung, asayadak. Masadangtetba rongsen ketangsür tajung ka sütettsü asenoki mapang tajungji bushidi. Onoki Pa sangtonger. Ibai ketangsüba shilem ka lir.
Kibuba, Tsüngrem jungkai adokba ketdangsür tajung ka ni kümdakjang. Amen.