Citizenship Bill ya Hindu Bangladeshi atema tongtipang liasü: Sarma

Guwahati, March 1 (Agencies): Muslim nunger nem Pakistan linük ka agütsü aser India-i Hindu nunger nem dang senso agütsür ta Assam finance minister Himanta Biswa Sarma-i ashi.
New Delhi nung India Today Conclave 2019 mapang Citizenship (Amendment) Bill indang olemtepba mapang Sarma-i iba onük jembi.
Iba sentong nung Meghalaya chief minister Conrad Sangma aser AIMIM tanishir Asaduddin Owaisi na aden.
“Assam sasep nung ni Citizenship (Amendment) Bill posema nungiter. Iba ya Bangladesh, Pakistan aser Afghanistan nung tamangba yimsü tsütsü telok tilatem dang nangzükba otsüsütsü mapa ka liasü” ta Sarma-i ashi.
“Onoki Hindu nunger nem senso agütsür saka onoki Muslim nunger nem-a linük ka agütsüogo. Onoki Muslim nunger nem Pakistan agütsü” ta paisa ashi.
“Iba mapang asenoki Muslim nunger nem linük ka agütsü. Tang nenoki item linük nung Hindu, Christian aser tanga telok tilatem nem senso agütsürba dang. Bangladesh mesüra Pakistan nung Muslim nunger shingaia parnok reshikangshir ta mashitsü kechiyong parnoki Quran amanger” ta Sarma-isa metetdaktsü.
Iba mapang All India Majlis-e-Ittehadul Muslimeen party tanishir Asaduddin Owaisi-i ashiba agi, “India ya Hindu linük” ka masü ta ashi.
Himanta Biswa Sarma ya Assam nung minister ka asü nung pai Assam Accord alema jembir, ta Owaisi-isa shisem.
Kechiba Hindu aser Christian tem reshikangshir ama nai bilemer ta Owaisi-isa Sarma dang asüngdang.
Owaisi-isa Sarma dang ‘nai India lemdangnür asü’ ta asüngdangdang Sarma-i kija dak tai metongloktsünür ta langzü.
“Nai Assam ya tanga Kashmir ka kümdaktsünür ama ni bilemer” ta Sarma-isa shisem.