Süngolu ayimertemi tanü Jorhat police anema lungkak aittsü ; Police-i methanol jemsemba ajanga nisungtem asü ta kuli agütsür

Jorhat/Guwahati March 1 (Agencies): Assam Tea Tribes Students Association (ATTSA) aser Assam Chah Mazdoor Sangha (ACMS), Titabar unit züngsemtemi March 2, 2019 nü lungkak aitba sentong ka agitsü.
Ozüng alema kidang yi yanglurtem aser Excise ketdangsertemi parnok dang nungi süpokrem meshia agiba anema ATTS aser ACMS-i sentongji agitsü.
Iba tesem nungi nisung 62 asüba nung süngolu nung mapa inyaker teimba liasü saka Jorhat Superintendent of Police-i bushisüngdang jungjunga masü aser nisung shinga mapu, ta Assistant secretary, ATTSA Dhiraj Gowala aser tangartemi züluba sangdong ka nung shia lir.
Police-i pei sasa RDX mesüra TNT yanglurtem apur süra kechiba ochimashiba Excise ketdangertem aser molasses yanglurtem mapur. Parnok teimba ka Assamese nunger masü, ta parnokisa ashi.
Kidang yangluba yi ji molasses enoka yanglu aser yi yanglurtemi molasses ji Jorhat nung alia bener aru, ta parnokisa metetdaktsü.
Iba tatalokba nung Jorhat aser Golaghat nungi nisung 155 tashi taküm sama saka police-i süoki ia mebilemer. Yi nung mim jemsemba ajanga nisung trok tashi nükpoker kümogo aser ano tangartema tenük apoktsüsa lir, ta parnokisa shisem.
Taoba hopta Golaghat aser Jorhat nung nisung taküm aika samatsüba yi tendangba nung methyl alcohol mesüra methanol dena aliba putet ta police ketdangsertemi ashi.
“Onoki tesem aika nungi yitem benden. Kar nung methyl alcohol aliba putet, doctor aser tangartemi methyl alcohol alitsü südi ta temulung melemi bilemba ama putetogo. Iba atema official osang ka atar” ta ketdangertemi ashi.
India nung yi nung mim jemsemer asüba tatalokba teimba ka nung Methanol mim mozü ajanga tepsetba putetogo.
Taküm February ita nung Uttar Pradesh aser Uttarakhand state tem nunga nisung 100 dak tema yi nung mim jemsemer asü.
2011 küm West Bengal nunga nisung 172 tashi methanol aliba yi ajemba sülen asü. Iba mapang yi yanglurtemi aibelena ethyl alcohol (ethanol) melena methanol enok.
Golaghat civil hospital nung superintendent Dr Uttam Prasad Dutta-i ashiba agi, “Methanol ya mim tamajung lir. Iba tatalokba nung nisung aika tenük agi junga manguba, saktsüba, tepok nung tashitsü atuba, tekolok meshitak akümba aser mena melitetba timtemtem liasü.”
“Iba jagi onoki yi nungji methanol enoksem asütsü akok ta temulung melemi bilem. Shirangertemi mapang shitak nung mozü kidangi aru asübo onoki anepalutetla, saka parnok temang tamajungba akümba sülen ang aru” ta Dr Uttam-isa shisem.
Assam Police-i ashiba agi February 21 nü Golaghat nung aliba Halmira Tea Estate nungi tetsür pezü mezüng shiranger ta mozü kidangi aru.
Tea estate hospital nung doctor Pranjal Sharma-i tetsür rongnung ka kidang nungi yi bener arua police nem agütsü. Yiji Droupadi Urang aser Sanju Urang nati bener aruba liasü aser tenaprongla asü, ta police-isa metetdaktsü.
“Golaghat aser Jorhat district tem nung nisung 44 puogo. Onoki bushisüngdanga arudang ozüng alema yangluba yi yanglurtem aser ayokertem indang maparen putetogo. Methyl alcohol ayokba nisung den ano nisung ana ano mapu lir,” ta Golaghat superintendent of police Pushpraj Singh-i ashi.
Yi nung mim jemsemertemi ashiba kulitem nung ajemdaker parnokji apu, ta Singh-isa ashi.
“Sen kanga meindoktsü aser ajangzüktsü atema yi yanglurtemi spirit aser tzü meyokteper ayok. Anameta aliba Karbi Anglong aser tanga tesemtem nung aliba distilleries nungi truck ajanga bener aruba ethyl alcohol auya” ta Assam additional director general of police (law and order) Mukesh Agarwal-i ashi.
“Iba tatalokba nung parnoki ethyl alcohol melena methyl alcohol aibelena auya aser ibaji tzü den meyokteper tyok” ta ketdangserisa ashi.
November 2017 nung excise department-i Golaghat nung mita aodang methyl alcohol litre 227 apu. December 2018 nung Golaghat kübok Jugibari nungi nisung ana apu. Iba yim ajanga Halmira aser temeket aliba tesemtem nung yi ayok, ta Golaghat excise department nung superintendent Shantanu Hazarika-ia ashi.