April 2019-March 2020′ ji Construction-Technology küm asütsü: PM

New Delhi, March 02 (Agencies): Tanü Ato kilonser, Narendra Modi-i, ‘April 2019-March 2020’ ji Construction-Technology küm asutsü, ta metetdaktsü.
Paisa linük nung jila/yimtitem nung bulua liteper aser ibaji ajanga ki aika nüngdaker, anungji ki yangluba nung advanced technology amshitsüla, ta ashi.
Paisa, 2022 küm tashi nungbo India nunger ajak lungro ki nung alitsü atema sorkar mangdang lir, anungji nija sector-i yariteptsüla, ta ashi.
Tanü Delhi nung Construction Technology India-2019 Expo den conference tenzüktsüba sülen Ato kilonseri, “NDA sorkari ki crore 1.3 yangluogo, ajisüaka taoba sorkaribo ki lakh 25 dang yanglu. Züngdangba jagi pasasa jembir. Ibaji ajanga sensakertem aser middle class purtem mangdang ataloktsütsü atema onoki nükjidong yur inyakba kuli sayur,” ta ashi.
“Onokisa ki ajak nung tzü, light aser Ujjwala connections (LPG) den tanga facilities agutsüner. Tesüiba küm pezü ser tesadang kija nunga kiojen renlokogo, ajisüaka ano teinyaktsü aika lir. Iba atemaji ni nija sector teyari nüngdaker. Sensakertem ajangzüktsü atema asenok longjemer inyakdi,” ta paisa metetdaktsü.
“Ki aika nüngdakba linük ishika rongnung India densema lir. Ibaji ataloktsütsü atema kiojen yangluba sector nung advanced technology nüngdaker. April 2019 nungi March 2022 ji Construction-Technology küm asütsü, ta ni sangdonger,” ta pai metetdaktsü.
Linük nung yimtsüngtem nungi jila aser yimtitemi oa litepba kanga bulur, anungji ki aika nüngdaker, ta shia pai, ibaji ataloktsütsü aser ki yangluba sector nung temelenshi adoktsü atema sorkari Pradhan Mantri Awas Yojana, Deen Dayal Antyodaya Yojana, National Urban Livelihoods Mission, HRIDAY, AMRUT aser Smart Cities mapatongtem benoka inyaker, ta metetdaktsü.