Google-i journalist atema PollCheck training agi

Kohima, March 2 (TYO): Journalist kati tazüngertem angatetdaktsütsü aser ochi osang metetdaktsütsü atema, shinga tsütsü meshii tatalokba osang shitakba sangdongtsüla ta tanü Senior Journalist aser Poll Check Kohima indang Trainer, Kallol Dey-i ashi.
Hotel East Gate nung Google News Initiative ajanga training series ka agidang Dey-i iba osang metetdaktsü.
India nung Lok Sabha elections agitsü mapang tonga arudang Google News Initiative (GNI)-i DataLeads aser Internews den yaritepa ‘PollCheck: Covering India’s Election’ tenzük. Indian election dak sendakba osang bendenba journalists tem yaritsü atema iba sentong tenzük, ta Dey-isa metetdaktsü.
Iba training ya Kohima dena linük kübok yimti 30 nung agitsü. Iba mapang taila osang azüoktsü, digital security aser elections atema YouTube amshiyim sayutsü.
Election tonga arudang Whatsapp, Facebook aser Twitter ama social media nung ocet aser noksatem prokshidar anungji journalist shiai kanga dang kümdanga osangtem bendena yanglutsüla. Olulu aser taila osangtem, noksa aser video tem ya social media nung mirok mi ama prokshir aser idangji public-i osang chichiba metettsü atema print aser electronic media indang osangtem repranger, ta Dey-isa ashi.
Taila osangtem ajanga mepetmesü adokdaktsür aser ozüng alema mapa inyaktsüsa tensa bentsür arur. Anungji, kuli shitak bushia ochi osang nübortem dang sangdongtsübaji journalist tem indang tebilemtsü lir, ta paisa shisem.
Dey-isa Google search teyari ajanga social media nung prokshiba taila noksa aser video tem kuli bushiba inyakyimtem power-point presentations ajanga sayu.
Iba training nung Kohima Press Club (KPC) aser Directorate of Information and Public Relations (DIPR) nungi journalist 35 shi ka aden.